Somali News

15 Safiir oo maanta la horgeynayo kulanka Golaha Wasiirrada

Golaha Wasiirrada da Xukuumadda Ra’isalwasaare Rooble ayaa lagu wadaa in ay maanta yeeshaan kulankooda khamiislaha ah.

Golaha Wasiirada la horgeynayaa  liiska illaa 15 Safiir oo cusub, si ay u meel mariyaan, inkastoo khamiistii hore ay goluhu soo diideen liiska Safiiro 12 ahaa, waxaa soo diidmadda lagu sababeeyay in aysan waafaqsaneyn qaabka awood qeybsiga 4.5 iyo xubnaha la soo gudbiyay oo u badnaa hal beel, taasoo ay su’aalo ka keeneen Wasiirada qaar.

Magacaabida Safiiradan ayaa ku soo aaday, xilli muddo xileedka Madaxweynaha talada haya uga dhiman tahay dhowr iyo labaatan cisho, waxaana ay u muuqataa mid Xukuumadda u adeegsaneyso olole siyaasadeed, maadaama xubnaha qaar ee Safiirada loo magacaabayo ay ka yimaadeen qaar ka mid ah Dowlad Goboleedyada taageersan dowladda Federaalka.

Magacaabidan haddii ay dhaqan gasho, waxaa la filayaa inay galaafan doonto safiirro hadda xilal ka hayo wadamada Ruushka, Pakistan, India, Kenya, Mareykanka, Koofurta Sudan, Itoobiya iyo Sudan, kuwaasoo boosaskooda ku weynaya hannaanka awood qeybsiga, sidoo kale Safiirada la magacaabayo howlgalintooda iyo aqbalaadooda dalalka loo dirayo waxay qaadan kartaa muddo 60 cisho.

Back to top button