Waxaa saaka barqadii magaalada Qaahira ee dalka Masar ku geeriyooday Allaha u naxariistee Danjire C/llaahi Xasan Maxamuud oo ahaa safiirkii Soomaaliya ee dalka Masar iyo wakiilkii joogtada ahaa ee Soomaaliya u fadhiyay Jaamacadda Carabta oo ku dhowaad 20 sano uu hayay xilkaasi.
Geerida Safiirka waxaa ka tacsiyadeeyay madaxda dowladda Federaalka Soomaaliya iyo shacab fara badan, waxaana lagu tilmaamay mid ka mida tiirarkii diblomaasiyadda Soomaaliya.
HADDABA HOOS KA AKHRI XUSUUSTA TAARIIKHDA SAFIIRKA
Marxuum Cabdullaahi Xassan Maxamuud waxa uu sannadkii 1943-kii ku dhashay Deegaanka Iimeey ee dhulka Soomaalida Ethiopia, wuxuuna howlaha diblomaasiyadda ku soo biiray sanadkii 1987,xilligaasi oo loo magacaabay Safiirkii Jamhuuriyadda Soomaaliya ee dalka Algeria .
Sanadkii 1990, waxaa loo badalay, loona magacaabay Safiirka Soomaaliya ee dalka Masar ahna Ergeyga Joogtada ee dalkeena uga wakiilka ah Ururka Jaamacadda Carabta , xilkaasi oo uu hayay tan iyo maanta .
Allah u naxariisto , Danjire Cabdullaahi Xassan Maxamuud , waxa uu ku matalayay kulamada kala duwan ee Jaamacadda Carabta Magaca Dowladda iyo Shacabka Soomaaliyeed muddo dhan 25 sano , isagoo shirgudoomiyay fadhigii heerka Wasiir Arrimo Dibadeed ee Jaamacadda Carabta , wareegiisii 123,aad ee qabsoomay March , sanadkii 2000.
Sanadkii 1996 ,dii waxa uu ku fariistay Kursiga Shir Madaxeedkii Jaamacadda Carabta ee ku qabsoomay Magaalada Qaahira , isagoo matalayay Magaca Madaxweynaha Jamhuuriyadda Soomaaliya .
Mudadii qaran burburka dalka uu ka jiray , Danjire Cabdullaahi Xassan Maxamuud waxa uu ka qeyb galay shirarkii dib u heshiisiinta ee kooxihii Siyaasadda Soomaaliya ku loolamayay loogu kala qabtay Magaalooyinka Qaahira , Addis Ababa iyo Carta , xubinnimo Baarlamaan oo loogu doortay Shirkii Carta- Djibouti sanadkii 2000 ayuu ka tanaasulay .
Sanadkii 1974- 1976 kii waxaa uu ahaa Iskuduwaha Waxbarasho ee gobolada Mudug, Banaadir iyo Xoghayaha guud ee goobaha waxbarasho ee guud ahaan Jamhuuriyadda Soomaaliya.
Sanadkii 1981 – kii waxaa loo magacaabay La-taliyaha Madaxweynaha Jamhuuriyadda Soomaaliya ee Arrimaha Jabhadaha .
Danjire Cabdullaahi Xassan Maxamuud waxa uu ka qaatay Darajada Licentiate ee Luqadda Carabiga iyo Culuumta Islaamka ,Kulliyadda Dar Al-ulum ee Jaamacadda Qaahira sanadkii 1969-kii .
Marxuum Danjire Cabdullaahi Xassan Maxamuud waxa uu ifka kaga tagay laba xaas iyo 8 caruur ah
Dhinaca kale, Wasiirka Arrimaha Dibadda iyo Dhiirigelinta Maalgashiga ee Jamhuuriyadda Federaalka Soomaaliya H.E. Dr. Abdusalam Hadliye Omer , Wasiiru dowlaha H.E. Khaled Omar Ali, Wasiir kuxigeen-ka H.E. Ahmed Ali Mohamed (Kadiye),Xoghayaha joogtada Mr. Ali Mohamed Ali, Agaasimayaasha Waaxyaha,Safiirada,Qunsulada guud ,Diblomaasiyiinta, La-taliyeyaasha Wasaaradda iyo Dhammaan Saraakiisha Wasaaradda Arrimaha Dibadda iyo Dhiirigelinta Maalgashiga waxa ay tacsi u dirayaan ehellada, qaraabada, asxaabta iyo dhammaan ummadda Soomaaliyeed geeridii ku timid Allah u naxariistee Ambassador Abdullahi Hassan Mohamud oo maanta oo ah Axad, November 22 , 2015 ku geeriyooday Magaalada Qaahira ee caasimadda dalka Masar.
Haddaba, annagoo ka murugeysan , kana tiiraanyeysan geerida Marxuumka , ayaa waxaan Allah uga baryeynaa inuu u naxariisto,qabrigiisana nuur iyo neecaaw udgoon ku siiyo- Aamiin.
Xigasho: Xafiiska Qeybta Warbaahinta iyo Xiriirka Bulshada ee Wasaaradda Arimaha Dibada
DAAWO WAREYSI SNTV LA YEESHAY SAFIIRKA 2014
Wadani.com
