Taliyihii ciidanka garoonka diyaaradaha magaalada Boosaaso ee Gobolka Bari Col. Xasan Shire Amaan ayaa maanta lagu dilay magaaladaasi iyadoo dilkaasina uu geystey mid ka mid ah ciidanka ilaalada Garoonka diyaaradaha, waxaana la xaqiijiyay inuu dilku ka dhacay albaabka saldhiga garoonka diyaaradaha Boosaaso.
Askariga dilka u geystay taliyaha ayaa la sheegay inuu baxsaday, wararka ayaa sheegaya askariga falkan geystay uu ka mid ahaa ciidanka garoonka oo dhowaan shaqada laga ceyriyay. Askartii kale ee goobta ku sugneyd ayaa la sheegay inay wax tallaabo ah ka qaadin askariga dilka u geystay taliyaha, taasoo keentay in askartaasi xabsiga la dhigo.
Col. Xasan Shire ayaan wadan ilaalo u gaara, isagoo ahaa qof iskiis u socda oo aan u baahan in la ilaaliyo. Ciidamada Booliska ayaa magaalada Boosaaso ka bilaabay baaritaan ay ku hubinayaan dadka soo gelaya iyo kuwa ka baxaya magaalada.
Col. Xasan Shire Amaaan, ayaa xilkan soo hayey tan iyo sanadkii 2003, wuxuuna ahaa shaqsi degan oo howshiisa ku filan.
Wadani.com
