Ra’iisul wasaarihii hore ee Soomaaliya, haddana ah Guddoomiyaha Madasha Midnimada iyo Dimoqraadiyada Soomaaliyeed Dr. Cabdiweli Sheekh Axmed Maxamed ayaa magaalada Muqdisho ku tilmaamay dadka jooga inay wax waliba bililiqeysteen, wuxuuna tusaale ahaan u soo qaatay inay ka dhisan yihiin 5000 ururo dhalinyaro oo mid waliba sheeganayo inuu urur Soomaaliya yahay.
“Xamar waxaa ka jiray intii aan Ra’iisal wasaaraha ahaa 5000 urur dhalinyaro oo leh mid waliba ururka dhalinyarada Soomaaliya, weligoodna ma dhaafin Boondheere iyo Kaaraan,” ayuu yiri C/weli oo intaas ku daray isagoo qoslaya in wax waliba la biliqeystay guryo, hay’adihii iyo magacii.
Hadalkan ayuu Dr. Cabdiweli Sheekh Axmed Maxamed ka jeediyay kulan uu la qaatay dhalinyarada Puntland. Waxaan arrintan ka xumaaday dad badan oo C/weli Sheekh Axmed ku eedeeyay inay qabyaaladi qaaday.
“Haddii dadkii kale magaca Soomaali naceen oo iska tuureen, haddii reer Muqdisho sheegtaan oo ku faanayaan, ma wax ceeb ahbaa mise waa bililiqo… miyaanay dadka Muqdisho Soomaali ahayn” ayuu yiri Cali Muuse Xuuti oo ka mida dhalinyarada Muqdisho oo qoraal u soo diray Wadani.com, wuxuuna intaas ku daray: “Muqdisho waxay ku faantaa Soomaalinimo, waana tan lagu soo dhoweeyay C/weli Sheekh Axmed oo uu Ra’iisal wasaaraha ku ahaa isagoon tegi karin degaanadii uu ka soo jeeday, waana abaal dhac iyo gef inuu maanta reer Muqdisho ku ceebeeyo Soomaalinimada ay ku dhegan yihiin…”
Wuxuu kaloo Cali Muuse is weydiiyay C/weli Sheekh oo hadda sheegta inuu madax ka yahay Madal Soomaaliyeed, degaanada Soomaaliyeed oo dhan inuu tegay oo ka dhisay iyo inay Muqdisho iyagoo jooga oo dhowr siyaasi ah ay sheegtaan Madal Soomaaliyeed oo la ogyahay inaysan gaarsiisneyn Afgooye iyo Balcad iska daaye degaano kale.
Dhageyso hadalkii C/weli Sheekh Axmed
