Wararka laga helayo magaalada Beledweyne ayaa sheegaya in Beesha Xawaadle ay qarka u saaran tahay inay ku dhawaaqo diidmada federaalka dowladda Soomaaliya wado iyadoo shir xasaasi ah uga socdo magaalada Beledweyne.
Beesha oo isku khilaafsaneyd shirka ayaa waxaa xaaladda uga sii daray markii ay magaalada Jowhar ka laabteen qaar kamida odayaasha dhaqanka Beesha oo saluugay qaabka wasaaradda arrimaha gudaha u qeybisay odayaasha soo xulaya ergada shirka.
Ugaaska Beesha ayaa isugu yeeray shirka beledweyne ka socda oo ay dhowaan ku biirayaan xildhibaanada iyo siyaasiyiinta beesha, waxaana laga cabsi qabaa inuu ka soo baxo go’aan ah in gobolka Hiiran aanu ka mid noqon doonin maamul kale, kuna biiri doonin gobol kale.
Xildhibaan Cali Nur Xaaji Boodaaye oo ka mid ah xildhibaanada kasoo jeedo gobolka Hiiraan ayaa ku eedeeyey Wasaaradda Arrimaha Gudaha iyo guddigeeda fududeynta shirka Jowhar inay talada kala wareegeen dadka degaanka.
“Waxaa khalad ah qaabka loo maray shirka oo ka duwan sidii maamuladii hore loo dhisay..” ayuu yiri xildhibaanka oo intaas ku daray in Wasaarada Arrimaha Gudahaay howsha u wadaan wasiiro kasoo jeedo labada gobol, inkastoo ay mas’uuliyiin qaran haddana aanay go’aan u gaari karin beelaha kale.
Waxa kale oo uu sheegay in beelaha dagan Hiiraan ay hada u fadhiyaan shirweyne ay uga tashanayaan aayahooda iyo waxa kaga aadan shirka ka socda Hiiraan iyo Shabeelaha dhexe.
Gobolka Hiiraan oo ay degaan beelo ka badan 9 ayaa waxaa qorshaha diidmada maamulka wada qaar kamida beesha Xawaadle.
Wadani.com
