Guddi ay dowladda Kenya u magacawday inay soo baaraan weerarkii Alshabab ku qaaday 15-kii Janaayo 2016 ciidamada Kenya ku sugnaa xerada Ceel-caede ee Gobolka Gedo ayaa ku eedeeyay beesha Mareexaan inay gacan ka geysatay weerarkaasi oo kooxda Al-shabaaab u sahashay inay gaadmo ku laayaan askartooda.
Sida uu qoray Wargeyska the Standard ee kasoo baxa Kenya, baaritaannka oo ahaa hordhac ay sameeyeen guddiga ayaa lagu ogaaday in Saddex ka mid ah Askarta Kenya oo ka baxsatay weerarka oo gurigiisa uu ku qariyay nink deegaanka u dhashay, kuwaasoo mar dambe la dilay kaddib markii sida wargeysku xusay ay dadka deegaanku ku wargeliyeen Al-shabaab joogitaanka askartaas.
“Beesha Mareexaan waxay u arkaan ciidanka Kenya inay yihiin kuwo taageeraya beesha Ogaadeen ee maamulka Jubba hogaankiisa heysata qabiilo kale oo uu loolan kala dhaxeeyo, waana mid ka mid ah waxyaabaha keenay inay ciidanka la dilo..” ayuu yiri mid ka mid ah mas’uuliyiinta dowladda Kenya oo codsaday inaan magaciisa la shaacin oo la hadlay wargeyska The Standard.
Sidoo kale, wargeyska ayaa sheegay in kooxda weerarkaas baareysa ay maalintii Khamiista ahayd ay gaareen saldhigga ciidamada lagu weeraray; isla markaana la filayo inay warbixin ku saabsan qaabka weerarku u dhacay u gudbiyaan abaanduulaha ciidamada KDF Samsom Mwathethe.
Saldhigga Ciidamada Kenya ay ku lahaayeen Deegaanka Ceel-cadde ayaa ahaa Saldhiggii Saddexaad ee ay Al-shabaab la Wareegaan muddo toddoba bilood ah; isla markaana ay ku laayaan tiro ka tirsan ciidamada Midowga Afrika ee ka Hawlgala Soomaaliya [AMISOM].
Kenya ayaa u muuqata inay faraha la gashay arrimaha beelaha Soomaaliyeed isku hayaan, taasoo saldhig ay u ahayd markii ay taageereen kooxda Raaskaambooni.
Goobgooge.com/the Standard
