Kadib dhacdadii lagu qarxiyay diyaaradii Daallo Airlines ee ka duushay Garoonka magaalada Muqdisho 2-dii Bishab Febraayo waxaa aad loo adkeeyay ammaanka garoonka Muqdisho iyadoo la soo kordhiyay baaritaano dheeraad ah oo cid waliba ay mareyso.
Wasiiro, taliyeyaal ciidan iyo xildhibaano ayaa ka mid noqday dadka la baarayo ee la marinayo baaritaanka adag ee garoonka Aadan Cadde, waxaana ugu danbeeyay wasiirka Maaliyadda Dowladda Federaalka Maxamed Aadan Ibraahin Fargeeti oo sida dadka caadiga ah u maray baaritaanka xilli uu ka duulayay garoonka Muqdisho Jimcihii shalay.
Sheekada Wasiirka Fargeeti iyo Garoonka diyaaradaha waxaa qoray Weriye Moalimuu oo ka mid ahaa dadkii isla shalay ka dhoofayay garoonka, kadib markii uu ka soo kabsaday dhaawacii kasoo gaaray weerarkii Liido.
HOOS KA AKHRI QORAALKA WERIYE MACALIMUU
Wasiir ilbax ah oo isku kalsoon.
Shalay ayaa waxaan ka soo dhoofay garoonka diyaaradaha Muqdisho ee Aden Adde ,maadaama qalqal amni uu garoonka ka dhacay maalmo ka hor amniga aad baa loo adkeeyay ,eeyo carbisan ayaa baaryay boorsooyinka taasi ma ahan wax aniga shaqsiyan ugu cusbaa laakiin arinta i soo jiidatay waxa ay aheyd Wasiir min bilow ilaa iyo dhamaad feylka nagula jiray intii aan soo marnay oo idil .Aqoon gaar uma lihi Wasiirka, laakiin waa nin macruuf ah, hadda ka hor ayaan mar wareystay, dhowr jeer oo uu shir saxaafadeed qabtayna waa aan ka qeyb galay.
Waa Wasiirka Maaliyadda Soomaaliya Maxamed Aden Fargeeto. Iga rumeyso Wasiirka min bilow ilaa iyo dhamaad shacabka ayuu dhex jiray waxa uuna la wadaagayay amarrada caadiga ah ee shacabka la siinayay, istaaga, dib u daga, soo dhaafa IWM, balse intaas oo idil Wasiirku hal mar afkiisa kama uusan soo bixin inuu Wasiir yahay, carruurtiisa ayuu daadihinayay.
Waxaa jiray xildhibaano baartitaanka marAyay hase yeeshee aan shacabka ku goob aheyn. Markii la soo gaaray goob aanan loo ogoleyn in ay shacabka ka gudbaan ayaa wasiirka askari uu ku yiri ma adigaa dhoofaya ,Wasiirku waxa uu yiri, maya ee caruurtaa dhoofeysa, haye halkaaga ka noqo ayaa la yiri, Wasiirka caruurtiisa ayuu ku yiri nabadeey oo uu gacan haatiyay, mar labaad ma sheegan inuu Wasiir yahay, wuuna iska laabtay.
Dadkii safka aan ku wada jirnay oo qaarkood waji yaqiin Wasiirka ayay arintan dood ka dhex dhalisay, nin oday ah ayaa soo booday wuxuu yiri Wasiirku waa ilbax waana isku kalsoon yahay, Wajeer baa inoogu dhow markaan tagno amarka waa la qaadanayaa, maxaa diidaya in badbaadada wadanka awgiis uu amarka askariga Soomaaliyeed raaco oo aan kuwada calool fiyoobaano.
Fiiri sawirada hoose
GOOBJOOGE.COM
