Xarakada Al Shabaab ayaa beenisay war kasoo baxay dowladda Kenya oo lagu sheegay in Diyaaradaha Dagaalka Kenya ay dileen Hogaamiye Al Shabaab u qaabilsan sameynta Qaraxyada oo lagu magacaabo Macalin Shariif duqeyn ka dhacday Koonfurta Soomaaliya.
Bayaan ka soo baxay Ururka Al Shabaab ayaa lagu xusay in qof lagu magacaabo Macalin Shariif aanu ka mid aheyn Al Shabaab, waxayna intaas ku dareen inaysan dhicin lagu dilay xubno ka tirsan Alshabaab oo ka dhacay Gobolka Gedo.
Alshabaab waxay sheegtay in Kenya ay faafineyso warar been abuur ah oo ay dooneyso inay ku dejiyo niyadda dadkeeda walaacsan ee laga askarta looga laayay dagaalkii Ceelcade, waana marki labaad ee Alshabaab ay beeniyaan war ay Kenya ku sheeganeyso inay dishay saraakiil Alshabaab ah.
Kenya ayaa hore u sheegtay inay duqeyn cirka ah ku dishay sarkaalka Amniyaadka Alshabaab ee Mahad Karate iyo ilaa 50 alshabaab ah oo isugu jira saraakiil iyo maleeshiyo la tababaray, laakiin waxaa la aqoonsan waayay goob ay Kenya sheegtay inuu weerarkaasi ka dhacay .
Kenya ayaa u muuqata inay dagaal afka ah ku jirto iyadoo aan weli shaacin askartii looga dilay dagaalkii Ceelcade tiradooda in ka badan muddo bil ah oo laga sugayay.
Wadani.com
