Waxaas maalta ka furmaya magaalada Istanbul ee dalka Turkiga Shirka Hiigsiga cusub ee looga hadlayo arrimaha Soomaaliya oo loogu magac daray Madasha Sare ee saaxiibada Soomaaliya (High-Level Partnership Forum).
Waa shirkii saddexaad ee noociisa ah oo ay qabanqaabisey Qaramada Midoobey iyo Dowladda Federaalka. waxaana shir guddoominaya Madaxweynaha Turkiga Recep Tayyip Erdogan, Madaxweynaha Soomaaliya Xasan Sheekh Maxamuud, waxaa kaloo ka qeyb galaya kuxigeenka Xoghayaha guud ee Qaramada Midoobey Jan Eliasson.
Warsaxaafadeed ay soo saartay Wasaaradda Arrimaha dibadda Turkiga ayaa lagu sheegay inay shirka ka qaybgalayaan dalal ka badan 50 dal, 12 urur oo caalami ah, Dowaldda Federaalka ah ee Soomaaliya iyo madaxda Dowlad Goboleedyada.
- Arrimaha shirkan heerka sare ah looga hadlayo waxaa ka mida:
- Amniga iyo nabadgelyada Soomaaliya
- Dib u dhiska hay’adaha dowladda
- Dib u heshiisiinta
- Doorashooyinka xilliga kala guurka iyo
- Horumarinta dhaqaalaha
Shirkan ayaa lagu wadaa inuu Turkiga uga dhawaaqo taageero caalami ah oo uu siinayo Soomaaliya, iyadoo heshiisyo fara badan ay kala saxiixan doonaan Turkiga iyo Soomaaliya.
Madaxweynaha Soomaaliya, Ra’iisal wasaaraha, Wasiiro ka badan toban, madaxda maamul goboleedyada iyo xildhibaano ka tirsan baarlamaanka Soomaaliya ayaa shirka ka qeyb galaya, waxayna dowladda Turkiga shaacisay in la dhameystiray qabanqaabadii shirka.
Wadani.com
