Waxaa maanta magaalada Jabuuti ka furmaya wadahadallo heer sare ah oo dhex maraya madaxda dowladda Federaalka Soomaaliya iyo Soomaaliland, iyadoo shirkani uu yahay mid dhacaya xilli xasaasi ah.
Madaxda shirka la isugu keenay, dalalka deriska ah iyo dowladda Mareykanka oo shirkan ka dabeysa waxay caddeyn u yihiin in awood weyn la geliyey in la isu keeno dadku ay taladu ka go’do labada dhinac ee saameynta leh, laakiin shirka oo fursad weyn noqonaya haddii heshiis lagu gaaro waxaa halis ku ah saddex qodob oo fashili kara. waxayna kala yihiin:
1- DOWLADDA MAREYKANKA
Ma cadda waxa Mareykanku ka damacsan yahay wadahadalka iyo dadaalka badan ee uu geliyey, waxaana diblomaasiyadiisa Geeska Afrika ay ahayd muddo dheer mid aan miro-dhal ahayn, taasoo ay ugu wacan tahay inuu arrimaha Soomaaliya u soo maro Itoobiya oo dano gaara ka leh Soomaalida kala qeybsan, taariikh iyo fahamna qoto dheerna u lahayn xaaladaha Geeska Afrika.
2- MUUSE BIIXI
Madaxweynaha Somaliland Muuse Biixi Cabdi inkastoo uu yahay madaxweyne la doortay wuxuu awoodi waayey inuu dadka ay taladu ka go’do ee Somaliland iyo xisbiyada siyaasadda ku qanciyo qorshaha Mareykanku wato ee Somaliya dib loogu mideynayo, wuxuuna door biday inuu qariyo arrimaha la hordhigay ee Midnimadu ka mid tahay.
Muuse Biixi wuxuu madaxda xisbiyada mucaaradka ee UCID iyo WADDANI u sheegay inuu Mareykanku awood saaray oo shirka Jabuuti ku qasban yahay, taasina waxaa ku cad inuusan diyaar u ahayn ama ku dhici karin inuu galo heshiis soo hadal qaadaya midnimo.
3- FARMAAJO
Madaxweynaha Soomaaliya Maxamed C/llaahi Farmaajo oo ku jira sanadkii ugu danbeeyay ee xilka madaxweynaha iyo xilli doorasho, ma joogo waqti uu go’aano waaweyn qaadan karo, waxaana mowqifkiisa hoggaamineynimo hoos u dhigaya inuusan heshiis la ahayn maamuladii dowladda federaalka ka tirsanaa, isla markaana uu xitaa isku heynin kuwii ay isku beesha ahaayeen ee Puntland iyo Jubbaland oo shirka Jabuuti u arkaya mid beeshoodu ka maqan tahay.
Arrimahan oo dhan waxay shirkani weyn ka dhigayaan mid aysan labada dhinac u diyaar garoobin oo aanay cidna awood u in lagu gaaro heshiiska laga doonayo, waxayna aakhirka u eg tahay in arrimo hoose oo aan masiiri ahayn laga soo saari doono, haddii aan lagu kala tegin.
