Dagaalka lagula jiro Alshabaab ayaa ku sii baahaya Gobollada iyo Maamul Goboleedyada Dalka, iyadoo weli socdaan abaabulka ciidamada maamul Goboleedyo hor leh.
Jubbaland ayaa la sheegay inay ku jirto diyaar garowgii ugu danbeeyay ee dagaal ka dhan ah Alshabaab, waxaana dhowaan uu Madaxweynaha Maamulkaasi Axmed Maxamed Islaam shaaciyey inuu dagaalku ka bilaabanayo degaanada Jubbaland, kadib sanado ay difaac ahaayeen.
Dhinaca kale Maamulka K/Galbeed ayaa ku dhawaaqay dagaal ka dhan ah Alshabaab oo ka bilowday degaanada maamulka K/Galbeed, gaar ahaan Gobolka Sh/Hoose.
Wasiirka amniga Koonfur Galbed Maxamed Isaaq Cabdi iyo mas’uuliyiin kormeer ugu tegay ciidanka K/Galbeed ayaa u sheegay in maamulku uu u diyaar garoobay dagaal ka dhan ah Al-Shabaabiyo, kana bilaaban doono Gobolka Sh/Hoose.
Dhinaca kale waxaa Gobolka Hiiraan, gaar ahaan degmada Maxaas ka socda diyaar garow cusub oo lagu doonayo in dib loogu qabsado deganaadii ay habeen hore banneeyeen ciidamada dowladda iyo kuwa degaanka ee Moqokori iyo Yasooman.
Waxaa kaloo Muqdisho laga dareemay diyaar garowga beelaha Gobolka SH/Dhexe oo lagu wado inay maalmaha soo socda ku biiraan dagaalka lagula jiro Alshabaab.
