Ra’iisal wasaaraha Itoobiya Abiy Ahmed ayaa farriin garab istaag ah u diray dadka Somaliland iyo shacabka Hargeysa ee uu saameeyay Dabkii weynaa ee xalay baab’iyey qeybo ka mida suuqa weyn ee magaalada Hargeysa.
Farriin uu Af-Soomaali ku soo qoray Bartiisa Facebook soo dhigay Abiy Ahmed isagoo yiri: “Waxaan aad uga naxay, kana tiiraanyooday dabka ka kacay Suuq-weynaha badhtamaha Hargeysa, kaas oo khasaare ballaadhan u geystay hantidii Shacabka. Hadda lama qiyaasi karo Khasaarahaas”
Qoraalka Ra’iisal wasaaraha Itoobiya ayaa lagu soo gabagabeeyay: “Waxaannu Shacabka Somaliland La qaybsanaynaa murugada dhibkaas ku yimid. Waxaannu u sheegaynaa inaannu garab taagannahay Waqtigan aad ka u adag. Waxaanu Eebbe ka rajaynaynaa inuu Khasaarahaas dheef ugu beddelo xilligan aannu ku jirno Bisha barakaysan ee Ramadaan. Eebbe ayaa inna leh, xaggiisana weynu ku-noqonayaa”.
Madaxweynaha Somaliland Muuse Biixi Cabdi oo jawaab iyo mahadcelin degdega u diray Ra’iisal wasaaraha Itoobiya ayaa isna qoraal kooban ku yiri: “Mahadsanid mudane Ra’iisal Wasaare, waxa aan kaaga mahad-celinayaa adiga, shacabka iyo dowladda Itoobiya sida wanaagsan ee walaaltinimada leh ee aad noogu soo gurmateen wakthigan adag. Shacabka jamhuuriyadda Somaliland wey xasuusnaan doonaan garab istaagiinnan”.
