Xaaladda magaalada Jigjiga ee ismaamulka Soomaalida Itoobiya ayaa qasan, kadib markii ciidamada milateriga Federaalka Itoobiya ay saaka la wareegeen goobaha muhiimka ah ee magaalada.
Ciidamada ayaa lagu arkay bartamaha magaalada iyadoo wata gawaarida Gaashaaman, waxayna arrintan ka dambeysay xiisad soo dhex gashay dowladda Federaalka iyo madaxweynaha Dowlad Degaanka Soomaalida Itoobiya Cabdi Maxamud Cumar oo diiday inuu tago magaalada Addis ababa oo looga yeeray.
Rasaas ayaa laga maqlay magaalada, waxaana la arkayaa dadweyne ka baxsanaya isku dhacyada iyadoo ilo xogogaal ah ay sheegeen in ciidamada Liyu Polce ay difaacayaan madaxweyne Cabdi Iley oo aan la ogeyn wacaalkiisa. Warar aana xaqiijin ayaa sheegaya in xabsi guri la geliyey.
Warar kala duwan ayaa kasoo baxaya magaalada Jigjiga, waxayna madaxda maamulka DDSI waxa ka socda magaalada Jigjiga ku tilmaameen afgembi milateri oo dowladda Federaalka Itoobiya ku dooneyso inay maamulka kula wareegto.
Telefishanka Itoobiya ayaa xaqiijiyey in ciidamada Federaalka ay la wareegeen xarumaha dowladda ee Jigjiga, sida Baarlamaanka, Garoonka diyaaradaha iyo dhismayaasha xukuumadda, iyadoo laga hortegay kulan ay yeelan lahaayeen Baaramaanka DDSI oo laga cabsi qabay inay u codeeyaan xaqa gooni isu taagga Soomaali Galbeed.
Dadweynaha magaalada ayaa bilaabay bannaanbaxyo ay uga horjeedaan ciidamada qabsatay magaalada, waxaana ay gubeen taayaro, iyadoo xaaladdu kasii dareyso.
