Xukuumadda Soomaaliya ayaa qaadeysa tallaabadii ugu weyneyd ee dib u habeyn lagu sameynayo maamulka Wasaaradaha iyadoo tartan loo geli doono jagooyinka Agaasimeyaasha wasaaradaha.
Ra’iisal wasaare Xasan Cali Kheyre ayaa saxiixay wareegto ku saabsan nidaam la sheegay in shaqada dalka ay ku dhisnaato aqoon, iyadoo agaasimeyaasha guud ee wasaaradaha loo soo bandhigi doono shacabka, si cadaalad ahna loo xuli doono.
Kheyre ayaa u xil saaray Guddi uu madax ka yahay Ra’iisal Wasaare kuxigeenka Mahdi Maxamed Guuleedi iyo koox wasiiro ah oo ka shaqeyn doona in tartan la geliyo jagooyinka Agaasimeyaasha Wasaaradaha, kadibna lagu soo xulo 26-ka agaasime ee xukuumadda.
DHAGEYSO RA’IISAL WASAARAHA
Ra’iisal wasaare Xasan Cali Kheyre oo arrintan soo rogay ayaa sidoo kale qorshe u dejiyay in qaab miisaaman ay beelaha uga dhex muuqdaan agaasimeyaasha oo muddo dheer qaab 4.5 oo khaldan xilalka ku hayay.
Waa markii ugu horeysay ee agaasimeyaasha wasaaradaha loo tartamayo, waxayna haddii ay tallaabadan hirgasho noqon doono mid hore loogu qaaday magacaabidii ay sameyn jireen madaxweynaha iyo Ra’iisal wasaaraha oo xilalkan lagu bixin jiray abaal marin iyo qaab beeleed.
