Waxaa sii xoogeystay dadaallada ay wakiilada Beesha Calaamka ugu jiraan in xal loo helo muranka hareeyay doorashada 2020/2021 ee keenay inuu dib u dhac weyn ku yimaado jadwalkii ay ku heshiiyeen Madaxweynaha iyo Madaxda dowlad Goboleedyada.
Beesha Caalamka ayaa dadaal ugu jirta in madaxweyne Maxamed C/llaahi Farmaajo uu xal u helo saddex qodob oo ka mida kuwa hortaagan doorashada, waxayna kala yihiin:
1- Soo xulista Guddiyada Doorashada ee xildhibaannada kasoo jeeda Somaliland, waxaana arrintan culeys u yeelay guddoomiyaha Aqalka Sare oo dacwooyin u qoray Beesha Caalamka.
2- Arrinta Gobolka Gedo ayaa ah dhibaatada ugu weyn ee hadda heysata hore u socoshada jadwalka doorashada, waxaana laga rabaa inuu madaxweynaha xal u helo xildhibaannada lagu dooranayo Garbahaarey oo Axmed Madoobe ka hor yimid.
3- Qodobka sidii lagu heli lahaa Doorasho lagu qanacsan yahay oo hufan ayaa ka mida arrimaha ay dooneyso in la dhaqan geliyo Beesha Caalamka, tasoo lugta la galeysa guddiyada Doorashada ee dowladda Federaalku magacawday, balse ay diideen musharixiinta xilka Madaxweynaha.
Qorshe ay beesha caalamka riixeysay oo ahaa in degdeg loo doorto Aqalka Sare, maadaama ay doorayaan Baarlamaanada maamul Goboleedyda ayaa socon waayey, iyadoo aan xal loo helin is mari waaga ka taagan Doorashada, waxaana tobanka berri ee ugu horeysay bishan Disembar 2020 qorsheysnaa in la doorto senatoorada Aqalka Sare.
Wafdi ka socday wakiilada beesha calaamka ayaa dhowaan tegay magaalada Gorowe, waxaana lagu wadaa inay tagaan Kismaayo iyo magaalooyinka dowlad Goboleedyada si arrinta Doorashada xal loogu helo, balse waxaa muuqata inay waqti qadan doonto sidii Madaxweyne Farmaajo ugu qanci lahaa arrimahan.
