Khudbaddii Musharax Cosoble oo saameyn weyn abuurtay khudbaddii uu ka horjeediyey musharax madaxweyne Cabdiqaadir Cosoble Cali Baarlamaanka Federalka Soomaaliya waxay soo jiidatay dhammaan intii daawaneysay, dhegeysaneysay iyo xildhibaanaddii goobjoogga ka ahaa oo aan dareemi karo sidii saameyn xooggan ugu yeelatay quluubtooda.
Qodobada si gaarka ah u taabtay dadka waxaa ka mid ahaa dowladwanaagga oo uu sheegay waxa ugu horeeyo uu qabanayaayo inay tahay soo xullidda ra’iisul wasaare iyo xukuumad leh karti, aqoon iyo hogaamin wanaagsan soona jiidan karta, ra’iisul wasaarahaas oo soo dhisi doono xukuumad wax ka qabata xaalada adag ee wadanka uu ku jiro oo koox gaar ah ama shaqsi gaar ah aysan lahayn balse ku hogaamisa dalka dastuurka iyo sharciga u yaal.
Wuxuu xusay in xukuumadda uu dhisayo qayb libaax ah laga siin doono haweenka iyo dhalinyarada maadaama ay dalka soomaaliyeed u badan yihiin. Waxyaabaha kale ee aadka loogu riyaaqay hadalka Musharaxa Madaxweyne Cabdulqaadir Cosoble ayaa waxaa ka mid aheyd in amniga shacabka ay sugi karto oo kaliya ciidanka soomaaliyeed.
“Amni aan garsoor caadil lahayn lama sugi karo” ayuu sii raaciyay hadalkiisa. Waxaa kale oo uu ku nuuxnuuxsaday arimaha hormarinta dhaqaalaha iyo ilaalinta bii’ada isagoo sheegay in shacabka aanu ku hormari karin wax dibada laga keenay, balse ay muhiim tahay inay isku tashadaan oo ay baahidooda daboolaan, isagoo balanqaaday inuu xoogga saari doono waxsoosaarka gudaha, dhiirigelinta warshadaha yaryar iyo maal gelin sidii dalka loogu heli lahaa, waxaana sheegay in la dhisi doono hay’ad ka shaqeeysa maal-gashiga ( investment authority ).
Dhalinyarada soomaaliyeed ayuu Musharaxu wuxuu u balan qaaday inuu shaqooyin u abuuri doono kuna jiheynayo wax soo saarka beeraha, xoolaha, kaluumeeysiga iyo qayraadka dabiiciga ah. Meelaha kale oo uu ka hadlay waxaa ka mid ahaa arimaha dibeda iyo xiriirka caalamiga, federaleyn dhab ah iyo dib u heshiisiinta iyo in caruurta soomaaliyeed ee danyarta ah ay heli doonaan wax barasho lacag ah ilaa heer dugsi sare.
Dhamaan Qodobada uu ka hadlay Musharaxa Madaxweyne, Xildhibaan Cabdulqaadir Cosoble ayaa ahaa kuwa nuxur leh oo soo jiidanaya dhamaan inta dhageeysaneeysay, loona qabay baahi aad u badan. Ugu dambeeyntii musharax madaxweyne Cabdiqaadir Cosoble Cali wuxuu xildhibaanada ka codsaday inay codkooda siiyaan wuxuuna u balan qaaday inuu ka shaqeeyn doono amnigooda, kor u qaadida sharafta iyo karaamada xildhibaanka iyo daryeelkooda. Hadaba xildhibaanada labada aqal ayay u taalaa xullidda ruuxii lagu aamini lahaa masiirka ummadda soomaaliyeed hase yeeshee musharax madaxweyne Cabdiqaadir Cosoble Cali ayaa waxaa loo arkaa inuu yahay nin mudan inuu noqdo madaxweynaha dalka soomaaliya, islamarkaana ay haboon tahay in fursad la siiyo.
