Liiska Lix xildhibaan oo maanta lagu doortay magaalada Baydbaba: Shariif Xasan oo waayey kursigii Beeshiisa
Waxaa magaalada Baydhaba maanta lagu doortay lix xildhibaan oo ka tirsan Golaha Shacabka Baarlamaanka Federaalka, lagana soo doorto Maamulka K/Galbeed.
Xildhibaannada maanta soo baxay ayaa meesha ka saaray laba siyaasi oo caan ka ah degaanada Koonfur Galbeed, kuwaas oo kala ah: madaxweynihii hore ee maamulkaasi Shariif Xasan Sheekh Aadan iyo Wasiirka Howlaha Guud xukuumadda Federaalka Xuseen Maxamed Sheekh Xuseen.
Liiska Xubnaha soo baxay waxay kala yihiin:
1- Maxamed Sheekh Cabdullaahi Ciirow oo ahaa Taliyaha Qaybta 60aad ee Ciidanka Xoogga Dalka ayaa kusoo baxay kursiga HOP077, kaddib markii uu helay 83-cod, waxaa la tartamay Cabdinaasir Cali Xasan oo isna helay 13-cod. Kursiga waxaa hore ugu fadhiyey Isgoowe Deeqow Isaaq.
2- Cabduqaadir Cumar Macalin ayaa kusoo baxay kursiga HOP186, isagoo helay 75 Cod, musharixii la tartamay ee C/qaadir Aadan Cali ayaa isna helay 25 Cod. Waxaa kursigan hore ugu fadhiyey Maxamed Xuseen Isaaq Afarraale.
3- Saalax Shariif Sayid-Cali ayaa kusoo baxay kursiga HOP261 markii uu helay 90 Cod, halka musharaxii la tartamay Ismaaciil Shariif Cali uu kahelay 10 cod. Kursigaan waxaa ku fadhiyay Cabdulqaadir Shariif Xasan Sheekh Aadan oo ah wiil uu dhalay musharax Shariif Xasan oo laga celiyey inuu Baydhaba u tago kursigan.
4- Axmed Madoobe Nuunow oo ah Wasiirka Qorsheynta Maamulka Koonfur Galbeedayaa kusoo baxay Kursiga HOP099, isagoo helay 75-cod; halka musharaxii la tartamay Cabdinasir Ibraahim Aadan uu ka helay 25-cod.
5- Luul Ibraahim Cumar ayaa kusoo baxday Kursiga HOP168 iyadoo heshay 86 cod, waxaana tartanka ka haray mushariixin rag ahaa oo la diiwaan geliyay, markii qoonde haween loo bedelay, waxaana hore ugu fadhiyay Xasan Macalin Xuseen.
6- Cabdisalaan Cali Cabdi ayaa kusoo baxay kursiga HOP167, isagoo heley codad gaaraya 74-cod, halka musharaxii la tartamay Cabdi Maxamuud Maxamed uu ka helay 23-cod, waxaana kursigaan horay ugu fadhiyay Wasiirka Howlaha guud ee xuuumadda xilgaarsiinta Xuseen Maxamuud Sheekh Xuseen (Badni).
