Qoraal kasoo baxay Xafiiska Madaxweynaha Soomaaliya ayaa lagu shaaciyey in la joojiyey bixinta, hibeynta iyo wareejinta dhulka dowladda.
Qoraalkan oo kusoo beegmay xilli uu madaxweynuhu safar ku jiro, isla markaana ay socdeen warar ku saabsan in maamulka G/banaadir uu bixiyey dhul dan guud ahaa ayaa waxaa ka muuqdo degdeg iyo xaalad abuur ku saabsan iska hor keenka madaxtooyada iyo maamulka G/banaadir.
Haddaba Qoraalka kasoo baxay Madaxtooyada oo magaca madaxweynaha loo adeegsaday markii la qiimeeyo waxaa ku jira saddex khalad oo waaweyn, kuwaasoo kala ah:
HAY’ADDA UGU SAREYSA
1- In Madaxtooyada ay noqoto halka arrimaha muranka dhulka lagu xaliyo, waa arrin muujineysa in xafiiska ugu sareeya dalka uu gacanta kula jiro howl kasta iyo xaalad kasta oo soo kororta, waxaana sidaas meesha uga baxaya shaqadii xukuumadda, tii wasaaradaha u xilsaarnaayeen iyo maamullada Gobollada.
HANTIDA DANTA GUUD
2- Hantida Danta guud ee maqan iyo bixinta hantidaasi waa arrin xasaasi ah oo soo jirtay tan iyo dowladii hore ee kacaanka, waxaana si xowli ah loogu takri falay dhulkii danta guud gobol kasta oo dalka ka mida, iyadoo kaabayaal dhaqaale oo waaweyn sida dekado ay beelo gaara heystaan. Waxaa iyana wax lala yaabo ah in xafiiska madaxweynaha arrintan dhulka danta guud ku soo koobo magaalada Muqdisho iyo G/Banaadir, sida in madaxweynuhu xukumo Muqdisho oo kaliya, waxayna ahayd in war-madaxweyne loo ekeysiiyo oo saameynaya guud ahaan Jamhuuriyadda.
8-DA FEBRAAYO KADIB
3- Khaladka ugu yaabka badan ee ka dhex muuqday Warka kasoo baxay Xafiiska Madaxtooyada ayaa ah in arrinta dhulka dant guud ee la joojiyey bixintiisa ay kasoo bilaabaneyso kadib doorashadii Madaxweyne Farmaajo 8-da Febraayo 2017, iyadoo la ogyahay in xilligii ugu badnaa dhulka dowladda la bixiyey uu ahaa 2012 ilaa 2017. Tani waxay micnaheeda noqoneysaa inuu Madaxweynaha xalaaleeyay wixii hanti dowlad ahaa ee la bixiyay intii ka horeysay markii uu xilka qabtay.
YAA KA DANBEEYAY..?
Marka la eego qaabka qoraalka loo dhigay, xilliga uu soo baxay iyo qaabka loo qoray wuxuu u muuqdaa qoraal ay diyaariyeen wiilal yaryar oo dagaal kula jira maamulka G/Banaadir, isla markaana ay u muuqato inay xiisad siyaasadeed ka dhex abuuraan madaxtooyada & G/Banaadir, waana isla kuwii hore madaxweyne Farmaajo u geliyay dagaallada sharciyeed iyo kuwa siyaasadeed marka laga soo bilaabo kiiskii Qalbi-dhagax.
