Agaasmihii hore ee NISA Fahad Yaasiin ayaa ku eedeeyay agaasimaha xilka ugu danbeeyay inuu ka danbeeyay abaabulka dilka Ikraan Tahliil Faarax oo ka tirsaneyd Hay’adda NISA, isla markaana ay qeyb ku lahaayeen Ra’iisal wasaare Maxmaed Xuseen Rooble iyo Wasiir ku xigeen C/raxmaan Al-cadaalla.
Eedeyntan oo ka mid ahayd wareysi lala yeeshay Fahad Yaasiin ayuu si toos ah weerar ugu qaaday Mahad Salaad oo xilliga la waayey Ikraan Tahliil ahaa xildhibaan Golaha Shacabka, isagoo sheegay inuu xiriir dhow la leeyahay Mahad Karate oo ka tirsan madaxda Sare ee Alshabaab.
Haddana waxaan halkaan dib idinkugu xusuusineyaa halgankii dheeraa ee Xildhibaan Mahad Salaad iyo Fahad Yaasiin dhex maray, xilligas oo Mahad Salaad uu adeegsan jiray baraha bulshada.
Qormada soo socota waa ugu horeysay, uguna xasaasineyd ee xildhibaan Mahad Salaad ka qoray Kiiska Ikraan 22 July 2021, kadib muddo bil ku dhowaad ah markii uu falku dhacay:
Qorshaha khaarijinta Ikraan Tahliil waxa soo maleegay Fahad Yaasiin iyo Kulane Jiis, fulintiisana waxaa u xilsaarnaa Yaasiin Farey!
Xog rasmi ah oo aan ka helay saraakiil sarsare oo ka tirsan Hay’adda Nabad Sugidda in muddo ahna aan dabo socday xaqiijinteeda waxay sheegaysaa in mar hore la dejiyay qorshaha lagu khaarijinayo Ikraan Tahliil. Ikraan oo dalka ka maqneed markii shirqoolka loo maleegay ayaa lagu qarash gareeyay boqolaal kun oo dollar iyo balanqaadyo been ah si dalka dib loogu soo celiyo loona khaarijiyo!
Ikraan markii dalka ay ku soo laabatay isla markiiba waxaa la xaddiday dhaqdhaqaaqeeda, waxaana loo xilsaaray dabaggalka iyo la socodka Ikraan Taliyaha Nabad Sugidda Gobolka Banaadir Yaasiin Farey. Wuxuuna ahaa qofkii ugu dambeeyay ee Ikraan ay wada hadleen kahor inta uusan go’in xiriirkeeda!
Qorshaha khaarijinta Ikraan oo markii hore la rabay in la qariyo ayaa markii qoyskeeda qaylo-dhaantu ka soo yeertay Fahad Yaasiin isku dayay in uu Alshabaab lacag ku siiyo si ay u sheegtaan dilka Ikraan Tahliil lkn waa guul dareystay isku daygaas kadib markii ay soo farageliyeen sida la sheegay saraakiil sarsare oo Alshabaab ka tirsan qaraabo dhawna ay yihiin Ikraan.
Sababta Ikraan in la dilo loo go’aamiyay ayaa la ii sheegay labo arimood oo aad xasaasi u ah oo ay macluumaad ka heysay, kuwaas ku saabsanaa sidii loo qorsheeyay dilkii Allaha u naxariistee Eng. Yariisow oo xafiiskiisa ay madax ka ahayd iyo arimo waaweyn oo Fahad Yaasiin iyo Kulane Jiis ku lug leeyihiin!
Ehelada Ikraan waxaan kula talinayaa in ay qabsadaan Qareeno dabogal iyo baaritaan ku soo sameeya shirqoolka Ikraan si looga gungaaro fal dambiyeedka dhacay, loona cadeeyo cida ka mas’uulka ah!
W/Q: Hon. Mahad Salad
