Alshabaab ayaa caawa bayaan kasoo saartey weerarradii ay shalay iyo xalay ka fulisay Xalane magaalada Muqdisho iyo Lama-galaay magaalada Beledweyne.
Bayaanka oo ku qornaa luqadaha Soomaaliga iyo Ingiriiska ayaa lagu faahfaahiyey qasaaraha ka dhashay labada weerar, waxayna Alshabaab sheegatay in 23-kii Maarso 2022, xubno ka tirsan guutada is-miidaamiyeyaasha Xarakada Al-Shabaab ay weerar xoog-ku-gal ah ku qaaden xerada Xalane ee Muqdisho.
“Weerarkan halyeynimo ayaa u hirgalay sidii loo qorsheeyay, wuxuuna sababay dhimashada afar ka mid ah saraakiisha reer galbeedka iyo 13 kamid ah ciidamada Afrikaanta ee loo yaqaano AMISOM. Weerarkan waxaa sidoo kale ka dhashay dhaawaca 15 kamid ah ciidamada Afrikaanta iyo burbur hantiyadeed oo xooggan” ayaa lagu yiri Bayaanka Alshabaab.
Alshabaab waxay kaloo sheegatay in dagaalyahanadeeda ay dab qabadsiiyeen qaybo kamid ah xerada Xalane oo ah saldhigga ugu weyn ee ay ciidamada AMISOM ku leeyihiin geyiga Soomaaliyeed.
Afhayeenka Booliska Soomaaliya ayaa qirtay in weerarkii shalay ee Xerada Afisyoone lagu dilay dad Ajnabi ah oo gaaraya 5 qof oo uu ku jiro askari ka tirsan AMISOM.
Dhinac kale Alshabaab waxay Bayaankooda ku caddeeyen in weerar laba qarax ay ku beegsaden xerada Lama-Galaay ee ku taalla magaalada Beledweyne, halkaasina ay ku dileen ilaa 47 qof, kuna dhaawaceen in ka badan 90 kale.
