Alshabaab fageaare ku yaalla Magaalada Bu’aale ee Gobolka J/Dhexe ku dishay shan nin oo ay kusoo eedeysan inay basaasiin u ahaayeen dowlado shisheeye iyo dowladda Federaalka.
Maxkamadda Alshabaab ayaa xukun di ah ku riday Raggan oo lagu eedeeyay inay jawaasiis u ahaayeen sirdoonnada dowladaha shisheeye, iyadoo midka mida raggaasi lagu gowracay goob fagaare ah markii lagu sheegay inuu madax ka ahaa kooxdan basaasiinta ah, horena u dilay xubin ka tirsan Alshabaab, qofna uu gowracay.
Ragga la toogtay ama la gowracay waxay kala yihiin:
1- Maxamed Soomow Ibraahim (Booroow) 20 sano jir oo la sheegay inuu madax u ahaa kooxda lagu eedeeyay basaasimada oo u shaqeynayey Sirdoonka Somaliya oo lagu qabtay Bu’aale, waxaa lagu eedeeyay inuu qof dil gowrac ah ugu geystay Bu’aale, waxaa kaloo lagu eedeeyay inuu dilay xubin ka tirsanaa Al Shabaab. Ninkan ayaa gowrac lagu dilay.
2- Maxamed Cusmaan Maxamuud (Maxamed Deeq) oo 16 sano jir ah ayaa ka mid ahaa dadkii la toogtay markii la sheegay inuu qirtay Basaasnimada lagu eedeeyay iyo inuu la shaqeynayey BS-ta uuna shaqaaleysiiyey Boorow.
3- Ismaaciil Saciid Kabiir oo 49 sano jir ah ayey Alshabab ku toogtay Bu’aale, iyadoo lagu eedeeyay inuu shaqaalaysiiyey madaxa kooxda Maxamed Soomow.
4- Maxamed Axmed Aadam oo 42 sano jir ahaa ayaa isna Alshabaab toogasho ku fulisay, markii lagu eedeyay inuu u shaqeynayey sirdoonka Dowladda Federaalka, balse aanu shaqo gelin.
5- C/qaadir Xasan Cali oo 22 sano jir ah ayaa isna la toogtay, markii la sheegay inuu qirtay inuu hagay duqeyn loo geystay guryo ku yaalla Bu’aale, kuna xirnaa CIA-da Mareykanka.
Alshabaab ayaa dhowaan magaalada Jilib ku dishay shan nin oo kale oo lagu eedeeyay basaasnimo, waxayna maxkamadaha Alshabaab xukunnadooda ku saleeyaan qirasho loo cuskado denbiyada loo heysto dadka la dilayo.
