Maleeshiyada Alshabaab ayaa dagaal la’aan kula wareegtay xalay xilli danbe degaan u dhow magaalada Dhuusamareeb ee caasimadda maamulka Galmudug.
Wararka laga helayo Gobolka Galgaduud ayaa sheegaya in Alshabaab ay qabsadeen degaanka Ceel-dheere ee gobolka Galguguud oo magaalada Dhuusamreeb u jira 30-KM, una dhaxeeya Guricel iyo Dhuusamareeb, iyadoo aanu wax dagaal ah ka dhicin.
Dadka degaanka iyo Saraakiil ka ciidamada dowladda ee Gobolka Galgaduud ayaa laga soo xigtay in maleeshiyada Al-Shabaab ay gudaha u galeen degaanka Caaldheere, islamarkana ay bur-buriyeen xarumihii maamulka, Saldhigii iyo xeradii ciidamada dowlada oo ay Miinooyin waaweyn ku xireen.
Ciidamada dowladda ee halkaas ku sugnaa ayaa la sheegay inay banneeyeen ka hor imaanshaha Alshabaab, waana magaaladii labaad ee ay Alshabaab qabsadaan, kadib degmada Matabbaan oo qabsadeen Isniintii, kadibna ka baxeen.
