Wararka laga helayo Gobolka Jubbada Dhexe ayaa sheegaya in maleeshiyada Al-Shabaab dagaal ku dhex maray degmad Jilib, kadib markii ay koox ka mida ay damceen inay xiraan xubno lagu tuhunsan yahay inay hoggaanka sare mucaarad ku yihiin.
Warar kale ayaa sheegay in koox oo isugu jirta saraakiil caddaan ah kuwo Soomaali ah iyo maleeshiyo looga shakiyey inay xiriir la leeyihiin kooxda Daacish, taasoo keentay in amar lagu bixiyo in lasoo xiro, laakiin iska hor imaadkii ugu horeeyay ayaa dhex maray labada dhinac.
Maleeshiyada Al-Shabaab ayaa weerartay masaajid ku yaalla degmada Jilib, waxaana la sheegay in mid ka mid ah maleeshiyada ajaanibta ee ka tirsan Al-Shabaab uu diiday inuu is dhiibo, isagoo Bam gacmeed lasoo baxay, taasoo keenay inay toogteen maleeshiyada Al-Shabaab. Ninka la toogtay ayaa magaciisa lagu sheegay Abu Anas Al-Misri, wuxuuna kasoo jeedaa Masar.
Sidoo kale wararka ayaa sheegaya in la xiray in ku dhow 100 xubnood oo isugu jira xubno ka tirsan ururka Al-Shabaab iyo ganacsato iyo xubno kale oo lagu tuhmay nay qorsheynayeen inay ku biiraan ururka Daacish.
Xubnaha la xiray ayaa la sheegay inuu ka mid yahay Macallin Daauud oo la sheegay inuu horey u ahaan jiray madaxa dacwada ee Gobolka Gedo. Waxaa kaloo ka mid ah mid ka mid ah weriyayaasha u shaqeeya ururka Al-Shabaab.
Al-Shabaab ayaa la sheegay inay ilaa shalay xubno kale ka qabqabteen Saakow, Buula Fuulaay iyo Kuunya Barrow. Ururka Daacish ee Soomaaliya ayaa xubnaha ka tirsan ay ka go’een Al-Shabaab sannadkii 2015-ka, waxaana ururka Al-Shabaab ay dileen xubnaha lagu tuhunsanaa inay ka tirsan Daacish.
