Alshabaab ayaa jawaab ka bixisay Khariidadii dhowaan lagu arkay website-ka Wasaaradda Arrimaha dibadda Itoobiya ee Soomaaliya lagu daray Itoobiya, arrintaas oo dood badan k dhalisay baraha bulshada.
Farriinta maalinta Ciidul fitriga o ka soo baxday Hoggaanka Alshabaab ayuu afhayeenkooda Sheekh Cali Dheere ku sheegay in Khariiraddii ay soo saartay wasaaradda arrimaha dibadda dowladda Itoobiya muujineyso inay Itoobiya caddeysatay damaceeda fog ee ay ku doonayaan in ay ku qabsadaan dalka.
Wuxuu hoggaankii dowladda Federaalka Soomaaliya ku eedeeyay inuu ku adeeganayo Gummeysiga Itoobiya ayna ku fogaatay dabadhilifnimadu, sida uu yiri, wuxuuna sidoo kale sheegay in kheyraadka dadka Soomaaliyeed ay boobayaa shisheeye sida ka dhacday Shirkii London ee lagu iibiyey shidaalka Soomaaliya.
Sheekh Cali Dheere wuxuu sheegay in Itoobiya ay tahay dalka kaliya ee saddex safiir u joogaan Soomaaliya, ayna muddo dheer duullaan ku hayeen dhulka Soomaaliyeed, wuxuuna intaas ku daray inaysan jirin cid aan fahmin ujeedadda caddowga xabashida.
“Waxaa xusid mudan inaysan Khariiradaasi ka hadlin madaxda dowladda Somalia, waa inay umaddu ogaataa in madaxdaas ay yihiin u adeegayaasha xabashida oo mar waliba la duuban..” ayuu yiri Sheekh Cali Dheere oo sheegay inay Itoobiya iyagu ka hor taagan yihiin fulinta damaceeda.
