Machadka Hiraal ee Muqdisho ayaa faafiyey warbixin ku saabnsan sida Alshabaab ugu dhex milantay qeybaha bulshada iyo dowladda Soomaaliya, uguna suuragashay inay qaado canshuur ka badan tan ka hesho dowladda Soomaaliya, iyadoo adeegsaneysa cabsi gelin iyo hanjabaad.
Warbixin ay qortay BBC World, kana soo xigatay Machadka Hiraal ayaa ayaa lagu sheegay in ururka Al-Shabab dhaqaale badan oo canshuur ah uu ka qaado gudaha dalka taasoo ka badan tan dawlada Soomaaliya ay qaado, gaar ahaan magaalada Muqdisho.
Machadka cilmi baarista Hiraal ee uu gudoomiyaha u yahay la-taliyihii hore ee Amniga Madaxweynaha Soomaaliya Xuseen Macalin Warbixinta ku sheegay in Al-Shabab ay ganacsatada ka qaadaan lacag dhan 15 million oo dollar bil walba taasoo ka badan lacagta dawlada kasoo gasha canshuurta ay ganacsatada ka qaado oo gaareysa 7 Milyan oo doolar.
Al-Shabab waxay lacago badan oo baad ah la qaataan shaqaalaha rayidka ah ee dawlada iyo xataa saraakiisha ciidamada sida warbixintaan lagu xusay. Lacagta ay Al-Shabab ka qaadaan dadka Soomaaliyeed ee 15-ka million gaaraysa kala bar waxaa ay kasoo gashaa magaalada Muqdisho ee caasimada ah.
“Ganacsatadu waxay lacagta u baxshaaan oo ay Al-Shaabab u siiyaan waa cabsi ay ka qabaan waxyeelo loo geysto ee ma aha rabitaankooda” ayaa lagu yiri warbixintaan laga soo xigtay machadka baarista sameeyay.
Wareysiyo laga qaaday mas’uuliyiin dawlada ku jira, ganacsato iyo xataa hogaamiyaal ka tirsan ururka Al-Shabab oo magacyadooda la qariyay ayaa lagu ogaaday in Al-Shabab ay lacago bille iyo mid sanadle ah ka qaadaan dhammaan shirkadaha waaweyn ee dalka ka jira taasoo ay u kala qeybiyaan canshuur iyo sako iyo xataa mararka qaar shirkadaha laga qaado lacag dhan 2.5% oo ah Zeko.
Magaalada Muqdisho ganacsatada ka shaqaysta meelaha u dhaw xarumaha dawlada sida agagaarka madaxtooyadda ayaa warbixintaan lagu sheegay in laga qaado lacago canshuur ah oo Al-Shabab qaataan.
Dekeda weyn ee magaalada Muqdisho oo ah isha dhaqaalaha ugu badan uu kasoo galo dawlada ayay warbixintaan sheegaysaa in Al-Shababna ay il dhaqaale u tahay oo canshuuraan ganacsatada wax kala soo dega.
Mas’uuliyiin magacyadooda la qariyay oo dekeda ka shaqeeya ayay warbixintu sheegaysaa inay Al-Shabab u gudbiyaan waraaqaha maafeestada loo yaqaan ee maraakiibtu wadato. Shaqaalaha dowlada qaarkood ayaaa laga soo xigtay inay Al-Shabab siiyaan qeyb ka mid ah mushaarkooda si ay uga nabad galaan.
Warbixinta waxay soo xigatay sarkaal tirsan ciidamada Soomaaliya oo lacag badan laga qaaday si ay u suurto gasho sii wadista dhismo guri uu dhisanayay. Sarkaalkan ayaa sheegay in markii uu diiday inuu bixiyo lacagtii Alshabaab ay shaqaalihii dhismaha ka waday gurigiisa loo hanjabay lana joojiyay gaadiidkii qalabka dhismaha geyn lahaa taasoo ugu dambeyn keentay inuu baxsho lacag gaaraysaa 3,600$.
“Waan ku qasbanaa in lacagtaas baxsho anigoo dagaal kula jira maleeshiyadooda waayo wadada kale ee ii furan waxay aheyd inaan dhismaha joojiyo.. Anigoo ka xun ayaan baxshay lacagtaas” ayuu yiri sarkaalkan ka tirsan ciidamada dowlada magaciisa iyo darajiisaba la qariyay.
