Laba kamida mas’uuliyiinta Gobolka Hiiraan ayaa amar lagu bixiyay in la xiro, lagana joojiyo shaqada ay Gobolkaasi ka hayaan, sida ay sheegayaan wararka ka imaanaya magaalada Beledweyne ee Gobolka Hiiraan.
Xeer ilaaliyaha Qaranka Soomaaliya Dr. Axmed Cali Daahir ayaa la sheegay inuu warqad lagu soo xiro (barwa) u jaray labada mas’uul ee kala ah:
- Guddoomiye Kuxigeenka Gobolka Hiiraan Maxamed Ibraahin C/llaahi
- iyo Guddoomiyaha Magaalada Baledweyne Maxamed Cismaan Cabdi Qalaafow
Qoraalka xeer ilaaliyaha ayaa la gaarsiiyay maamulka Gobolka Hiiraan, iyadoo wasaaradda Arrimaha Gudaha iyo Federaalka laga dalbaday inay mas’uuliyiintaasi cadaaladda u gacan geliso. Waxaana la filayaa in maxkamad la soo taago. Baaritaan ku socday labadan mas’uul ayay wararku sheegayaan inuu heer gabagabo ah soo gaaray.
Qoraalka Xeer ilaaliyaha ayaa xaalad kacsan ka abuuray magaalada Beledweyne, waxayna wararku sheegayaan in maamulka gobolka wadahadal degdeg ka yeeshay arrintani balse aan wax go’aan ah laga gaarin, iyadoo xiisad kale oo ku saabsan shir lagu kala qeybsan yahay lagu wado inuu ka furmo B/weyne.
Lama oga sababta rasmiga ah ee Xeer ilaaliyaha Qaranka u amray xariga iyo Maxkamadeynta labadan mas’uuliyiintanka tirsan Maamulka Gobolka iyo kan degmada B/weyne, waxaase jiray tuhun musuqmaasuq oo sidoo kale hore loogu xiray mas’uuliyiin ka tirsan degmada B/Burte ee isla Gobolka Hiiraan.
[ad name=”HTML”]
[ad name=”HTML-6″]
[ad name=”HTML-1″]
