Amiirka dalka Qatar Tami Bin Hamad Al-thani ayaa qoraal uu soo saarya ugu hambalyeeyay dowladaha Soomaaliya iyo Kenya xiriirka ay soo ceshadeen ee diblomaasi.
“Waxaan ugu hambalyeynayaa Mudane Madaxweyne Farmaajo iyo Mudane Madaxweyne Kenyatta go’aanka xikmadda iyo geesinimada leh ee ay ku soo celiyeen xiriirkii diblomaasiyadeed ee Soomaaliya iyo Kenya” ayuu qoraalkiisa ku yiri Amiirka Qatar oo la sheegay inuu ka danbeeyay arrintan, labada dalna ay uga mahad celiyeen.
Amiir Tamiim ayaa qoraalkiisa uga hadlay kaalinta uu ka qaatay arrintan: “Waxaan si kal iyo laab ah ugu rajeynaynaa labada dal ee deriska ah iyo dadkooda nabadgelyo iyo xasilooni, sidoo kale waxaan u xaqiijinayaa in Dowladda Qatar ay waligeed sii wadi doonto ku dadaalka wanaagga iyo nabad dhalinta”.
Ergeyga gaarka ah ee Wasaaradda Arrimaha dibadda Qatar u diray Soomaaliya ayaa sidoo kale tegay magaalada Nairobi, iyadoo markaas kadib lagu dhawaaqay inay Soomaaliya soo celisay xiriirkii diblomaasi oo ay jarray bishii Disebar 2020.
