Toddobaad kasta, maalinta Arbacadda ayaa golaha wasiiradda madaxweyne Donald Trump waxa ay isugu tagaan qol qarsoodi ah oo ka tirsan Aqalka Cad, halkaas oo loogu dhigo casharo ku saabsan kitaabka masiixiga ah.
Balse waxaa la sheegay in dumarka aanan loo ogoleyn in ay casharada qeyb ka jeedinayaan ama ay dadka wacdiyaan. Waa talaabadii ugu horeysay muddo 100 sano ah oo laga hirgaliyo taariikhda Aqalka Cad ee looga taliyo Mareykanka.
Dadka xaadira waxaa ka mid ah madaxweyne ku xigeenka Mike Pense, xoghayaha arrimaha dibedda Mike Pompeo, waxbarashada Betsy DeVos, Tamarta Rick Perry, iyo xeer illaaliyaha guud Jeff Sessions, diiwaankana waa mid dheer.
Casharada waxa ay soconayaa 60 illaa 90 daqiiqo, dadkana markaas kadib waa u fasaxanyihiin in ay daaciga la xiriiraan haddii ay wax dheeraad ah u baahdaan. Daaciyada waxaa ka mid ah Ralph Drollinger, oo horey u ahaan jirey ciyaartooy kubbadda shabaqa.
Hadda waa 63 jir, waana baadari muxaadarooyin joogto ah u qabta qaar ka mid ah xertiisa oo hadda noqday xildhibaano Aqalka Sare iyo waliba wasiiro ka tirsan dowladda Trump, taas oo horseeday in Trump uu u yeerto ninkan si wasiiraddiisa oo dhan uu u siiyo casharo joogto ah.
Drollinger ayaa sheegay in uu rumeysanyahay in dadka hadda hormuudka ka ah Maraykanka ay yihiin dad aad u aaminsan diinta masiixiga, islamarkaasna ka fog dadkii calmaaniyiinta ahaa ee diinta iska fogeyn jiray.
Casharadan diinta waxa ay biloowdeen xilligii madaxweyne Bush, balse waxaa kaliya la siin jiray shaqaalaha darajadooda hooseysa. Trump kama mid ah kooxdan diinta loo dhigo, balse waxa uu Drollinger sheegay in uu yahay nin aad u rumeysan diinta.
Mar wax laga weeydiiyay sida la’isu waafajinayo aragtida Maraykanka uu ku dhisanyahay ee ah kala saarista diinta iyo dowladda, iyo casharada uu bixinayo, ayaa waxa uu sheegay in isagaba uu taas aaminsanyahay, balse shaqsi ahaan dadka dowladda ku jira ay xaq u leeyihiin in ay diintooda ku adkaadaan.
Xertiisa uma sheego sida ay u codeeynayaan, iyo siyaasadaha ay qaadanayaan, balse waxa uu rumeysanyahay in marka ay bartaan kitaabka masiixiga, in ay fahmi doonaan go’aanada ay qaadanayaan.
Baadarigan waxa uu ku noolyahay California, waxana uu todobaad kasta u duulaa magaalada Washington si uu casharada usoo bixiyo.
