Agaasimihii hore ee Hay’ada Nabadsugidda Soomaaliyeed Axmed Macallin Fiqi, isla markaana ahaa musharixiintii ugu danbeeyay ee jagada madaxweyne ee maamulka Galmudug looga adkaaday ayaa ka hadlay mooshinka madaxweynaha Soomaaliya laga keenay isagoo sheegay in Baarlamaanka Soomaaliya aanu wax badan ka qaban howshii loo igmaday.
Axmed Fiqi oo dhowaan noqday Xisbiga Daljir wuxuu sheegay in dhinacyada mooshinnada iska soo horjeeda keenay oo ka wada tirsan baarlamaanka Soomaaliya ay yihiin kuwa dhaawacaya dalka, loona baahnaa in wax walba sharciga la waafajiyo.
Guddoomiyaha Baarlamaanka Maxamed Sheekh Cismaan (Jawaari) ayuu ugu baaqay inuu fasaxo mooshinka xil ka qaadista madaxweynaha, wuxuuna ku taliyay in mooshinka loo gudbiyo maxkamadda sare.
Wuxuu sheegay inaysan xisbiyadooda aqbali doonin waqti kororsi ay sameyso dowladda Federaalka ee uu hoggaamiyo Madaxweyne Xasan Sheekh. Taasi haddii ay dhacdo ayuu ka digay inuu dhici doono wax uu ugu yeeray kacdoon shacab.
Axmed Fiqi oo wareysi siiyay idaacadda Goobjoog ee magaalada Muqdisho ayaan hadalkiisa la maqlin kadib markii looga guuleystay tartankii doorashada madaxweynaha Galmudug. Waxaana hadaladiisu ku soo beegmeen iyadoo mooshinka wadahadal laga furay.
Wadani.com
[ad name=”HTML-1″]
