Wasiirka arrimaha dibadda Itoobiya Dr. Tedros Adhanom ayaa kulan la yeeshay hogaamiyaha maamulka KMG ah ee Jubba Axmed Maxamed Islaan (Axmed Madoobe) oo dhowr maalmood socdaal ah ku tegay dalkaasi, wuxuuna Itoobiya ka codsaday inay dhexdhexaadiso isaga iyo Shariif Xasan Sheekh Aadan hogaamiyaha Maamulka K/Galbeed oo isna Itoobiya ku sugnaa.
Sida ay qortay barta wasaradda arrimaha dibadda Itoobiya ku leedahay Internetka waxay labada dhinac ka wada hadleen arrinta taagan. Axmed Madoobe aya soo dhoweeyay doorka ay Itoobiya ka qaadaneyso heshiisiinta iyo xalin khilaafka ka dhex jira dowladda Federaalka iyo Maamulka Juba. Juba ayuu sheegay inay nabad tahay oo ay dooneyso inay tusaale ku noqoto dhismaha baarlamaan dimoqraadi ah oo maamulku yeesho iyo xiriir fiican oo ay la yeelato dowladda federaalka si ay ugu daydaan maamulada kale ee dalka.
Axmed Madoobe wuxuu sheegay inuu jiro khilaafaad yaryar oo kala dhaxeeya maamulka deriska la ah ee Koonfur Galbeed. Wuxuu yiri “Arrintan waxay u baahan tahay in Itoobiya dareenkeeda ku soo jeediso maadaama ay tahay damaanad qaadaha nabadda Soomaaliya” Wuxuuna ka codsaday Itoobiya inay gacan ka geysato sidii loo xalin lahaa khilaafaadkaasi.
Wasiirka arrimaha dibadda Itoobiya Dr. Tedros Adhanom ayaa sheegay in arrintaasi ay tahay in lagu xaliyo iyadoo aan dibadda laga soo faragelin, isagoo sheegay inuu rajo fiican ku qabo in labada dhinac ay khilaafaadkooda ku dhameysan si nabad ah waqtiga ugu dhow ee suuragalka ah.
Wadani.com
[ad name=”HTML-1″]
[ad name=”HTML-6″]
