Madaxweynaha Dowlad Goboleedka Jubbaland ee Soomaaliya Axmed Maxamed Islaam ayaa ku dhawaaqay inuu baajiyey socdaal uu ku tegi lahaa magaalada Dhuusmareeb.
Qoraal laga soo saaray xafiiska Madaxtooyada Jubbaland ee Kismaayo ayaa lagu sheegay inuu Axmed Madoobe baajiyay safar uu ku tegi lahaa Xarunta Dowlad Goboleedka Galmudug ee Dhuusomareeb si uu uga qayb galo Xaflada lagu soo gabagabaynayo Heshiiska Ahlusuna iyo Galmuudg.
Arrintan ayaa sabab looga dhigay in shaqooyin muhiim ah uu ka qabanayo Xarunta Kismaayo iyo Safaro uu ku tagayo Magaalooyin kale oo Jubbaland kamida, waxaana warku intaas ku daray inuu Madaxweynaha Jubbaland soo dhoweeyay dhamaystirka heshiiska Ahlusuna iyo Galmudug.
Tallaabada uu qaatay Axmed Madoobe ayaa ah mid aan hore loo arag, iyadoo uu ka mida ahaa madaxda lagu casuumay xafladda, waxayna wararka qaar sheegayaan inay jiraan arrimo siyaasadeed oo sababay arrintan.
