Dood kulul oo ku saabsan Heshiiska Doorashada 2016 ayaa dib uga bilaabaneysa fadhiga Baarlamaanka Federaalka Soomaaliya, kadib markii la bilaabay in wax ka bedelka heshiiska doorashada oo Khamiistii xildhibaano badan ay is qoreen.
Xildhibaano ku dhow 60 ayaa isu qoray inay fekerkooda ka dhiibtaan qaabka doorashada ee ay baarlamaanka u soo gudbiyeen guddiga loo xil saaray, waxaana xildhibaanadii hadlay ay si weyn u diideen intooda badan dhismaha Aqalka sare.
Xildhibaanada ka soo jeeda mid ka mida beelaha ugu waaweyn dalka ayaa ku adkeysanaya in Aqalka sare lagu qeybiyo 4.5, waxayna diideen qaabka heshiiska ku qoran iyo kan ay soo diyaariyeen guddiga Baarlamaanka.
Xildhibaanada taageersan heshiiska in sidiisa loo ansixiyo oo u badan kuwa kasoo jeeda Puntland ayaa aad u yaraaday oo codkoodu noqday mid aan saameyn lahayn.
Dadaal madaxweyne Xasan Sheekh iyo Ra’iisal wasaare Cumar C/rashiid ku doonayeen inay Baarlamaanka ku qanciyaan ansixinta heshiiska ayaa fashilmay markii ay diideen xildhibaano badan.
Kulanka maanta ayaa lagu wadaa in cod loogu qaado heshiiska marka ay soo gabagabowdo dooda heshiiska ee xildhibaanada.
Wadani.com
