Mareykanka oo lagu eedeeyay inuu ku lug lahaa Mooshin xilka looga qaadi lahaa Ra’iisal Wasaarihii Pakistan
Baarlamaanka dalka Pakistan ayaa la kala diray, kadib xiisad ka dhalatay in codka kalsoonida loo qaado Ra’iisal wasaaraha dalkaasi Imran Khan ay xoogeystay.
Madaxweynaha Pakistan Arif Alvi ayaa kala diray Baarlamaankii dalkaasi, kadib markii uu sidaasi kula taliyey Ra’iisal wasaaraha dalkaasi Imran Khan.
Khilaaf siyaasadeed oo ka taagnaa dalka Pakistan ayaa ka dhashay xisbiyada mucaaradka dalka Pakistan oo olole ugu jiray Mooshin ay codka kalsoonida u qaadaan si xilka looga tuuro Ra’iisal wasaare Imran Khan.
Fadhigii Baarlamaanka dalkaasi ee maanta codka kalsoonida loogu qaadi lahaa Ra’iisal wasaaraha Pakistan ayaa waxaa ka hor yimid guddoomiye ku xigeenka Baarlamaanka Qasim Khan Suri oo shirka guddoominayey, isagoo sabab uga dhigay in ujeedka Mooshinka uu shaki badan hareeyay.
Saacad kadib madaxweynaha Pakistan Arif Alvi ayaa ku dhawaaqay inuu kala diray Baarlamaankii dalkaasi, taasoo ka dhigan in muddo 3 Bilood ah lagu qabanayo doorasho guud, lana dhisayo xukuumadda KMG ah oo Doorashadaasi qabanqaabisa.
Ra’iisal wasaare Imran Khan ayaa ku guuleystay in Baarlamaanka la kala diro, markii uu xaqiiqsaday inuusan sinnaba ku badbaadeynin, waxaana sidaasi meesha uga baxay Ra’iisal wasaarihii, isagoo galaaftay Baarlamaankiina, haddana waxaa xilka la wareegi doonta xukuumad KMG ah.
Mareykanka ayaa lagu eedeeyay inuu taageerayo ololihii mooshinka xil ka qaadista Ra’iisal wasaaraha Pakistan, halka Mucaaradka ay ku eedeeyeen inuu dalkaasi u gacan geliyay Hay’adda Lacagta adduunka ee IMF.
