Dowladda Soomaaliya ee fadhigeedu yahay magaalada Muqdisho ayaa si weyn uga welwelsan bannaanbax la sheegay inuu ka dhacay Caasimadda oo laga abaabulay baraha bulshada.
Bannaanbaxan oo markiisii hore ay baraha bulshada uga baaqeen xubno qurbejoog ah oo lagu yaqaan inay ka horjeedaan dowladda uu hoggaamiyo Madaxweyne Farmaajo ayaa lagu beegay kadib isu soo bixii Sabtidii hore ka dhacay Muqdisho ee ka dhashay darawal Bajaajle ah iy abtigii oo uu toogasho ku dilay askari Boolis ah.
Dadka bannaanbaxa u ololeyana ayaa ku kooban shaqsiyaad baraha bulshada soo dhigay baaqyo loogu yeerayo dadka inay isu soo baxaan, iyadoo saacadihii ugu danbeeyay la faafiyay dad wejiyadooda ku qariyey Boorar la sheegay in loo adeegsan doono bannanbax oo aan ka badneyn 10 qof.
Sidaasoo ay tahay dowladda Soomaaliya ayaa u muuqata inay cabsi weyn gashay iyadoo uu gilgilay bannaanbaxa aan la ogeyn cidda wada, waxayna ku dhaqaaqday tallaabooyin waaweyn, iyadoo lasoo kiciyey taageerayaal isugu jira siyaasiyiin, culimo iyo dad kala duwan oo difaacaya dowladda.
Waxaa lasoo bandhigay ciidamo la dagaalama bannaanbaxyada oo qalabkooda wata.
Waxaa la qabtay shir lagu diidan yahay inay wax bannaanbax ah dhacaan.
Waxaa saxaafadda la hadlay xubno ku dhow madaxweynaha, sida Salaad Cali Jeelle, Cali Maxamed Geedi, iyadoo markii ugu danbeysay uu soo hadlay Sheekh Nuur Baaruud.
Taliyaha Booliska ayaa saxaafadda la hadlay oo ka digay Bannaanbaxa.
Welina waxaa socda madaxa iyo taageerayaasha dowladda ee ka hadlaya bannaanbaxa aan la ogeyn cidda wadata oo u muuqda inuu si weyn u gilgilay dowladdii oo dhan.
Siyaasiyiinta ku xiran madaxtooyada ee xag-jirka ah sida Salaad Cali Jeelle iyo Cali Maxamed Geedi waxay xaaladda u bedeleen eedeynta mucaaradka dowladda iyo Alshabaab, iyagoo si aan macquul ahayn u fasiraya bannaanbaxan laga baqayo.
