Bannaanbxyadii ugu waaweynaa oo looga horjeedo madaxweynaha muddo xileedkiisu dhammaaday ee Maxamed C/llaahi Farmaajo ayaa caawa gilgilay waqooyiga Muqdisho.
Banaanbaxyada oo kasoo bilowday deganka Gubadley iyo Isgoyska Mariinada ayaa soo gaaray isgoysyada Sanca, Jardiinka, Siinaay iyo agagaarka Florence oo ciidamada dowladda ku sugnayeen, waxaana uu socday saacado badan, iyadoo ay ka eyb galeen dadweyne kala duwan.
Dadka isu soo baxay ayaa sitay Boorar lagu dalbanayo inuu dalka isaga baxo Maxamed Farmaajo oo ay ku tilmaameen ‘Keligii taliye’ iyo ereyo kale oo adag, waxayna caddeyeen inaysan aqbali doonin muddo kororsiga uu ku doonayo inuu xilka kusii joogo markii uu dhammaaday waqtigiisii.
Bannanabaxa habeennimada kla dhacay qeybo badan oo ka mida Waqooyiga Muqdisho ayaa yimid markii inta badan degaanada W/Muqdisho ay isaga baxeen ciidamada dowladda ee ka amar qaata Farmaajo, waxaana ku sugan ciidamo Milateri ah oo ka horjeeda.
Madaxweynihii hore Shariif Sheekh Axmed ayaa bogaadiyey bannaanbaxyada caaa ka dhacay Muqdisho, isagoo farriin uu soo diray ku yiri: ” Waxaan soo dhaweynayaa banaanbaxyada nabadeed ee lagu diidan yahay muddo kororsiga sharci darrada ah ee qaybaha bulshada Gobolka Banaadir ay ka dhigayaan magaalada Muqdisho. Waa tallaabo lagu difaacayo xorriyadda iyo dimuqraadiyadda, waxaana aaminsanahay in dibadbaxyadu yihiin habka ugu wanaagsan ee ay shacabka ku muujin karaan dareenkooda”.
