Maamulka Gobolka Gedo ee hoos taga Dowladda Federaalka ayaa shalay Galab iyo xalay waday abaabulka bannaanbaxyo ka dhacaya degmooyinka Gobolkaasi, kaasoo looga horjeedo maamulka Axmed Madoobe.
Bannaabaxyadan oo ay si toos ah ugu baaqeen dadka madaxda Gobolka iyo Degmooyinka Gedo ayaa yimid, kadib markii uu fashilmay shirkii madaxda Dowladda federaalka iyo Maamul Goboleedyada dalka uga socday magaalada Dhuusamareeb, waxaana si gaara looga horjeedaa madaxweynaha Jubbaland Axmed Madoobe.
Maamulka Gobolka Gedo ayaa Warbaahinta ka jirta Gobolka Gedo ka baahiyey in maanta la qabanayo bannaanbaxyo ka dhacaya Degmadooyinka Beled-xaawo, Garbahaarey, Buurdhuubo, Doolow, iyo Bardheere, iyadoo looga soo horjeedo in Gobolka Gedo la hoos geeyo Maamulka Jubbalanad ee Axmed Madoobe
Gudoomiyaha degmada Garbahaarey ee dowladda Federaalka magacawday Xasan Sheekh Cilmi ayaa ka mida mas’uuliyiinta ka hadlay arrintan, isagoo sheegay Axmed Madobe uu Gedo ku imaan karo oo kaliya isagoo madaxweynihii hore ah, isla markaana aanu xitaa Farmaajo keeni karin Gobolka sida uu yiri.
