Farriinta Beesha Caalamka ayaa lagu dalbaday in Wasaaradda Amniga iyo Hay’adda NISA ay xilliga kala guurka hoggaamiyaan madax awood u leh oo la qadariyo
Beesha Caalamka ayaa dalab degdeg u dirtay madaxweynaha muddo xileedkiisu dhammaaday Maxamed C/llaahi Farmaajo iyo Ra’iisal wasaaraha xukuumadda xilgaarsiinta Maxamed Xuseen Rooble.
War-saxaafadeed kasoo baxay Beesha Caalamka ayaa loogu sheegay inay la socdo dadaallada dhexdhexaadinta Madaxweyne Maxamed Cabdullaahi (Farmaajo) iyo Ra’iisul Wasaare Maxamed Xuseen Rooble ee khilaafkoodu ka muuqday waraaqihii ay is weydaarsadeen 16-kii Sebteember 2021.
Beesha Caalamka waxay sheegay inay ka welwelsan yihiin in arrimaha aasaasiga ah aan weli la xallinin, inkastoo in ka badan laba toddobaad ay jireen dadaallo dhexdhexaadin ah. Hubaal la’aantan siyaasadeed ee socota ayaa sii kordhisay halista dib-u-dhac kale oo ku yimaada: Geeddi-socodka doorashada; Waxayna horseedday jahawareer ka dhashay hoggaanka Wasaaradda Amniga Gudaha (WAG) iyo Hay’adda Sirdoonka iyo Nabadsugidda Qaranka (NISA), kuwaas oo waxtarkoodu muhiim u yahay la-dagaallanka Al-Shabaab iyo ilaalinta xaaladda nabadgelyo ee dalka.
“Saaxiibada caalamku waxay ku boorrinayaan Madaxweynaha iyo Ra’iisul Wasaaraha inay sida ugu dhaqsaha badan u gaaraan heshiis, si ay diiradda u saaraan hirgelinta heshiisyada doorashada ee 17-kii Sebteember 2020 iyo 27-kii Maajo 2021 iyo inay hubiyaan in hay’adaha amniga ee muhiimka ah (WAG iyo NISA) ay madax u yihiin hoggaamiyeyaal awood u leh oo la qadariyo, gaar ahaan xilliga doorashada” ayaa lagu yiri War-saxaafadeedka Beesha Caalamka.
* Hawlgalka Midowga Afrika ee Soomaaliya (AMISOM), Canada, Denmark, Egypt, Itoobiya, Midowga Yurub (EU), Finland, Jarmalka, Urur-Goboleedka (IGAD), Ireland, Talyaaniga, Kenya, Jaamacadda Carabta, Netherland, Norway, Qadar, Saudi Arabia, Sudan, Iswiidhan, Swisarlandh, Turkey, Boqortooyada Ingiriiska, Dowladda Maraykanka, Qaramada Midoobay.
