Wakiilada Beesha Caalamka ee arrimaha Soomaaliya ayaa war-cusub kasoo saaray shirka Dhuusamareeb 3, iyadoo ballanqaaday inay fududeynayaan sidii loo hirgelin lahaa natiijada kasoo baxda ee lagu heshiiyo.
Qoraalka Beesha Caalamka ayaa loogu baaqay madaxda ka maqan shirka Dhuusamareeb inay ka qeyb galaan shirka, waxaana looga digay in koox ama qeyb gaara ay gaarto go’aan ku saabsan Doorasho aan loo dhammeyn, waxaana arrintan ay soo baxeysaa iyadoo Beesha caalamka ay ku dhex jirto badbaadinta shirka Dhuusamareeb 3.
HOOS KA AKHRISO WAR-SAXAAFADEEDKA BEESHA CAALAMKA
Saaxiibada Beesha Caalamka oo ku Dhiirigeliyay Dhammaan Madaxda Inay ka Qaybqaataan Kulanka Doorashada ee Muhimka ah Ballanqaadayna Inay Fududeynayaan Hirgelinta Natiijada ka soo Baxda Kulanka
Muqdisho, 19 Agoosto 2020 – Saaxiibada Soomaaliya ee beesha caalamka waxay soo dhoweynayaan in hoggaanka Dowladda Federaalka Soomaaliya iyo kuwa Dowladaha Xubnaha ka ah Federaalka ay magaalada Dhuusamareeb soo gaareen 15kii bishan Agoosto, si ay u billaabaan kulankooda xiga, sida qorsheysnayd.
Waxay sidoo kale soo dhoweynayaan billowga hawsha Guddiga farsamo ee Wadajirka ah ee loo xilsaaray diyaarinta xulashooyinka hanaan doorasho oo la isugu tanaasulay oo la isku afgarto si Madaxdu uga baarandegaan. Saaxiibadu waxay si xooggan ugu dhiirigelinayaan Madaxda Dowladaha Xubnaha ka ah Federaalka ee aan weli kulanka ku soo biirin inay si toos ah ula xiriiraan dhiggooda hadda jooga Magaalada Dhuusamareeb si loo xalliyo wixii arrimo ah oo taagan si ay dhammaantood uga wada qaybqaataan.
Saaxiibadu waxay ku nuuxnuuxsanayaan inay Muhim tahay in dhammaan Madaxdu ay ka qaybqaataan shirmadaxeedkan si loo sii wado geeddi-socodka dhisidda isafgarad wadar-ogol ah, loona soo saaro heshiis ballaaran oo laga gaaro hanaanka doorashooyinka federaalka 2020/21 oo qanciya dhammaan Saamilleyda Soomaaliyeed.
Waxay dhammaan Madaxda xusuusinayaan muhiimadda ay leedahay ilaalinta Horumarka laga gaaray Dowlad-dhisidda Soomaaliya iyo ka soo bixidda ballammadii horey loo galay. Iyadoo tan la eegayo, saaxiibadu waxay mar kale adkeynayaan in isku day kasta oo uu ku kaco mid keliya ama qaar yar oo ka mid ah saamilleyda oo si qasab ah loogu mariyo qaabab doorasho uusan yeelan doonin sharciyad isla markaana aan laga hirgelin karin iyadoo aan taageerada lagama maarmaanka ah laga helin dhammaan saamilleyda kale.
Saaxiibadu waxay si dhow ula socdaan waxyaabaha ka soo kordha kulanka Magaalada Dhuusamareeb, waxayna Dabagal ku sameynayaan tallaabooyinka lagu heshiiyo waxayna diyaar la yihiin inay bixiyaan hadba taageerada ay ka codsadaan dhammaan ka qaybgalayaasha si loo fududeeyo hirgelinta.
Beesha Caalamka ayaa kala ah: Belgium, Boqortooyada Ingiriiska, Denmark, Djibouti, Dowladda Mareykanka, Faransiiska, Finland, Hawlgalka Midowga Afrika ee Soomaaliya (AMISOM), Holland, Ireland, Itoobiya, Japan, Jarmalka, Kenya, Midowga Yurub, Norway, Spain, Sweden, Talyaaniga, Turkey, Ugaandha, Urur-Goboleedka (IGAD), iyo Qaramada Midoobay.
