Booliska iyo dembi baarayaasha Turkiga ayaa caawa galay Guriga Qunsulka Sacuudiga ee magaalada Istanbuul, iyagoo ka bilaabay baaritaan ku saabsan kiiska saxafigii la waayey ee Jamaal Khashoqgi.
Booliska iyo Dembi baarayaasha Turkiga ayaa ku tuhunsan Guriga uu degan yahay Qunsulka Mohamed Alcuteybi oo dhow Qunsuliyadda Sacuudiga in lagu qariyey Jirka saxafiga Jamal Kashoqgi oo la sheegay in lagu dhex dilay Qunsuliyadda daqiiqado kadib markii uu galay 2-dii bishan Oktoobar.
Wararka ayaa sheegaya in Qunsulka Sacuudiga ee magaalada Istanbuul Mohamed Alcuteybi uu ka dhoofay dalka Turkiga, isagoo u duulay magaalada Riyaad, saacado kooban ka hor intii aanay Boolisku bilaabin baaritaanka Guriga Qunsulka, waxaana diyaaradii qaadi lahayd ku dhowaad saacado lagu xayiray Garoonka Ataturk ee magaalada Istanbul, inkastoo markii danbe loo fasaxay inay duusho.
Turkiga ayaa dadaal ugu jiray inay su’aalo weydiiyaan Qunsulka Sacuudiga oo laga rabay in wax laga weydiiyo su’aalo ku saabsan waxa uu ka ogyahay arrinta kiiska Jamal Kashoqgi, iyadoo aan la isla meel dhigin in arrintaasi dhacdo.
Wasiirka Arrimaha dibadda Turkiga ayaa sheegay inaysan wax gacan ah ama qirasho ah ka helin Sacuudiga, wuxuuna meesha ka saaray in Qunsuliyadda ay tahay meel dadka su’aalo lagu weydiiyey, isagoo sheegay inaysan jirin diblomaasiyiin Sacuudiyaan ah oo xayiraad ay saaran tahay.
Wararkii ugu danbeeyay ayaa sheegaya in ilo ka tirsan mas’uuliyiina Turkiga ay telefishanka CNN u sheegeen in jirka saxafiga la waayey ee Jamal Kashoqgi uu jarjaray guddoomiyaha guud ee hay’adda caafimaadka Sacuudiga kadib markii lagu dilay Qunsuliyadda.
