Wasiirkii hore ee waxbarashada C/llaahi Goodax Barre, kana tirsan Baarlamaanka Federaalka ayaa muuqaal uu soo duubay weerar afka ah ku qaaday madaxweynaha cusub ee Hirshabelle, isagoo sidoo kale eedeyn u jeediyey Ugaaska Beesha Xawaadle.
Goodax Barre oo isagoo xaalad caafimaad u jooga dalka Turkiga xilkii Wasiirka Waxbarashada laga qaaday ayaa ku eedeeyay Madaxweynaha Hirshabeelle Cali Guudlaawe Xuseen inuu yahay shaqsi neceb beel gaara oo uu ku jiro isir naceyb, wuxuuna ku tilmaamay nin reer Miyinimo ku weynaaday, wuxuuna ka hor yimid in lagu caleemo saaro magaalada Beledweyne, taasoo uu ku tilmaamay inay bahdilaad ku tahay beeshiisa.
Mar uu ka hadlay Ugaaska Beesha Xawaadle Ugaas Xasan Ugaas Khaliif ayuu si aan hore loo arag u dacaayadeeyay isago sheegay in laa aamusiyey oo uu meelaha Jaad isaga cuno, sida uu yiri.
Xildhibaan C/llaahi Goodax Barre ayaa ka digay haddii ay doorashada Soomaaliya ku socoto sida xaaladu xilligan tahay in xildhibaanno Alshabaab ah lasoo dooran doono, isagoo ka digay in arrintaas laga digtoonaado laguna heshiiyo doorashada si aysan fursada ugu helin Doorashada, taasoo loo arkay inuu ula jeedo Agaasimaha NISA Fahad Yaasiin.
Hirshabelle ayuu sheegay inay noqotay maamul dowladii timaada ay doorasho ku gasho, kana soo saarato xildhibaannadii ay rabto, dowladii hore iyo tan hadda jirtana ay ka siman yihiin arrintaasi.
