Waxaa magaalada Dhuusamareeb maanta ka dhacday Doorasho uu kusoo baxay C/llaahi Aadan Kulane oo ka mida madaxda Hay’adda NISA ee sida weyn loola xiririyey tacadiyadii ay hay’adaasi geysatay inuu talada hayey Madaxweyne Maxamed C/llaahi Farmajo.
C/llaahi Kulane Jiis ayaa cod gacantaag ah oo dhan 101 cod kusoo baxay, markii uu tartanka ka haray, musharax Xasan Cabdi Jaamac, waxaana sidaasi loogu dhawaaqay inuu kursiga HOP040 oo degaan doorashadiisa ay tahay Caabudwaaq iyo Balanballe. Waxa xusid mudan in kursigan oo ahaa qoonde haween laga wareejiyay.
C/llaahi Kulane oo hadlay ayaa sheegay inuu u mahad celinayo ergadii dooratay, odayaasha dhaqanka iyo Guddiga Doorashada, wuxuuna ballanqaaday laba qodob inuu ku dhaqaaqi doono.
Kulane Jiis ayaa caddeeyay in qodobka ugu weyn ee uu ku dhaqaaqi doono ay tahay wax ka qabashada colaadda ka taagan degaanka uu kursiga ku metelayo oo ah arrinta ugu weyn ee uu walaaca ka qabo iyo inuu codka dadka uu metelo gaarsiin doono meel uusan gaari jirin, sida uu yiri.
