Maxkamadda dajada koowaad ee Ciidamada Qalabka sida ee Soomaaliya ayaa maanta 30 Ogost 2021 xukun 10 sano oo xabsi ah ku riday Nin ka tirsanaa Kooxda Daacish-ta Soomaaliya, oo laga qabtay Garoonka Muqdisho, isagoo Daacish howlo usoo diratay.
Cabdisamad Ibraahim Cumar oo magaciisu Afgarashada ah loo yaqaan ‘Abuu-Cali’ ayaa aakhirkii sanadkii 2020 loo xiray ka mid ahaanshiyaha Daacish oo uu ka tirsanaa ilaa 2016, wuxuuna ku dhashay magaalada Gaarisa ee dalka Kenya, isagoo go’aansaday ku biirista Daacish isaga oo joogo Nairobi.
Maxkamadda Darajada koowad ayaa sheegtay in isla xilligaas uu u dhoofay, kana degay magaalada Boosaaso, isagoo uga sii gudbay buuraha Gal-gala, tababbarkiisii ugu horreeyay wuxuu ku qaatay meel lagu magacaabo Il iyo Camaaro, waxa uu kamid noqday koox jabhad ah oo weeraro ka geysta dhulka bari ee Puntland, wixii intaas ka dambeeyay kooxda ayaa go’aamisay in lagu daro qaybta warbaahinta oo loo diyaariyay in uu noqdo Muuqaal Duube.
Wuxuu u sheegay hey’adaha baarista in uu ahaa Muuqaal duubihii dagaal ku dhex maray Daacish iyo Alshabaab Muraale December 2018 iyo sidoo kale Baar-Gaalle oo isna dhacay March 2019, dagaalladaasi oo tirada la wariyay ee dhimasha iyo dhaawac ee kala gaaray lagu Ogaaday in ka badan 30 Xubnood.
Xafiiska Xeer Ilaalinta ayaa Maxkamadda ayuu uga warbixiyey taariikhdiisa iyo sida uu ugu biiray kooxda Daacish isaga eedeysanaha ah iyo Raggii kale ee fikirkan ay kasoo wada qaateen Nairobi, waxa ay Xeer Ilaalinta sheegtay in saaxiibbadiisa ay dagaallo u aadeen Liibiya ayna ku dhinteen halka labo kale oo isna ay wada joogeen ay ku dhinteen dagaal ay la galeen Ciidamada PSF-ta Puntalnd ee loogu tala galay la dagaalanka Argagixisada, waxa ay sidoo kale Xafiiska Xeer Ilaalinta ay la wadaageen Garsoorka dhaawac muujinta Eedeysanaha oo ku dhaawacmay dagaalladii ay la galeen Ciidamada Puntland.
Daacishta Soomaaliya ayaa Sawirqaade C/samad Ibraahim u soo wakiilatay inuu ka shaqo galo magaalada Muqdisho, balse waxaa laga qabtay, isagoo ka soo degaya Garoonka Aadan-Cadde ee magaalada Muqdisho.
Maxkamadda ayaa ku xukuntay C/samad Ibraahim Cumar 10-sano oo xabsi ciidan ah, sida uu ku dhawaaqay Gaashaanle Sare Xasan Cali Nuur Shuute guddoomiyaha Maxkamadda Darajada Koowaad Ee Ciidamada Qalabka Sida. Xukunsanaha ayaa haysta Fursad uu ku dalban karo Rafcaan 30-cisho gudaheed.
