Waxaa dalka Talyaaniga si weyn looga hadal-hayaa dood ku saabsan haweeneydii Talyaaniga Silvia Romano (Caa’isha) oo kadib markii laga sii daayey afduubkii lagu heystay gudaha Soomaaliya, balse ay shaacsisay inay islaamtay.
Kooxaha xagjirka Talyaaniga ayaa hanjabaadyo u diray haweeneydaasi iyagoo u muujiyey naceyb, qaarkoodna waxayba ku baaqeen in la daldalo, halka qaar kale ay aflagaado iyo hadallo naceyb ah ka faafiyeen sida inay argagixiso isu bedeshay iyo arrimo kale.
Caa’isha Romano ayaa boggeeda Facebook ugu jawaabtay, dadka ka hor yimid go’aankeeda ay ku qaadatay diinta islaamka, waxayna jawaabteeda ka dhigtay aayado Qur’aan ah oo ay ku fasirtay luuqaddeeda Talyaaniga.
Jawaabta Caa’isha Romano ayaa ahayd aayado ka mida suuradda Fussilat oo macnahoodu yahay sida soo socota:
Arrintan ayaa mar kale dood ka dhalisay baraha bulshada iyadoo aad looga hadlay ujeedada ay ka lahayd aayaadaha oo sheegaya in qofkii caddow kuu ah lagula dhaqo si wanaagsan, iyadoo kadibna uu noqon doono saaxiibkaa.
Wargeysyada kasoo baxa talyaaniga ayaa aad u falanqeynaya tallaabadan ugu dambeysay ee ay qaadday Silvia, xilli markii hore uu taagnaa muran xoog leh oo ka dhashay islaamnimadeeda.
Naceybka Silvia loo muujinayay ayaa si weyn loogu faafiyay baraha bulshada, waxayna dad badan ku doodayeen in ay khalad ahayd sii deynteeda iyo dadaalkii ku baxayba, mar haddii ay Islaamkii qaadatay.
