Muran, buuq iyo faro-isku taag ayaa hareeyay goob laga bixinayay kaararka lagu tegayo xafladda caleemasaarka madaxweynaha Soomaaliya Maxamed C/llaahi Farmaajo.
Koox loo xil saaray bixinta kaararka lagu gelayo ayaa lagu eedeeyay inay ku takri faleen qaabkii loo dhigay iyo liisas la siiyay, iyagoo kaarark ku bixiyay bar-garad.
Kooxda ugu darran ee arrintan saameysay ayaa ah saxafiyiinta oo intooda badan loo diiday kaararka, iyadoo la soo weriyay in qaar ka mida xarumaha warbaahinta ay qaateen Kaarar fara badan.
Waxaa goobta buuxiyay dadweyne u badan qurbe joog kuwaasoo noqday kuwa ugu badan ee helay kaararka, maadaama ay goobta gacanta ku hayeen Qurbe joog, waxaana xafladda lagu tilmaamay mid ay maamusheen qurbejoog.
Dadkii faraha badnaa ee goobtaasi buux dhaafiyay ayaa markii dambe loo sheegay inay dhammaatay khadkii lagu daabacayay kaararka oo ay raali ahaadaan, waxaana ay isu bedeshay goob fowdo ah.
Guddiga maamulka caleemasaarka ee uu madaxda u yahay wasiirka Qorsheynta ee xilka sii haya ayaa xakameyn waayay howshii ugu yareyd ee Kaarar bixinta, iyadoo la arki doono inta ka hartay xafladda.
Wadani.com
