Madaxweynaha xilka laga qaaday ee Hirshabeelle Cali C/llaahi Cosoble ayaa soo saaray amarro iyo eedeyn culys oo ku saabsan xil ka qaadistiisa.
Wuxuu xaaladda ka taagan Hirshabeelle ku eedeeyay inuu ka danbeeyo Ra’iisal wasaare Xasan Cali Kheyre, isagoo sheegay inuu maleegay burburinta maamulka Hirshabeelle.
Cali Cabdullahi Cosoble ayaa ka hadlay arrimo dhowr ah oo xasaasi ah, wuxuuna sheegay in afgambiga dhicisoobay oo la rabay in kursiga lagu boobo uu mas’uul ka yahay Ra’isul Wasaare Xasan Cali Kheyre in kaalin weyn ka qaadanayo bur burinta dowlad goboleedka Hirshabelle kaasi oo adeegsanaya Xubno ka tirsan Dowlad Goboleedka.
Wuxuu sheegay in Kheyre 5-tii bilood ee la soo dhaafay uu dabin u dhigayay sidii uu u kala diri lahaa maamulka, islamarkaana uu xayiray dhaqaalihii la siin jiray dowlad goboleedka.
“Anaga daacad ayaan iska eheyn runtii laakiin Ninka la leeyahay Kheyre waxa uu maleegayay bur burinta maamulkani, Hirshabeelle adiga ma dhisin waa jireysaa, adaa meesha ka baxaya oo siyaasadda si fudud ku soo galay, lacagta Kheyre uu ka xayiray Maamulka billooyinkii ugu dambeeyay ayuu hadda rabaa in uu u soo fasaxo oo lagu dumiyo Maamulkani Xildhibaanadana lagu kala fur furo ha ogaadaan Beesha Caalamka Waxa ay wado Xukuumadda Federaalka” Ayuu yiri Cali Cosoble.
Cali Cabdullahi Cosoble ayaa mar kale ku eedeeyay dowladda Federaalka, iyo koox ku sugan Jowhar inay handadayaan saxaafadda oo ay ka weecinayaan baahinta xaqiiqda jirta, iyo sidoo kale Xildhibaanada oo qaarkood hanjabaado aan loo meel dayin loo jeedinayo.
