Sabti 14 iyo Sabti 28 Oktoobar waxaa dhacay Qaraxyadii ugu Khasaaraha iyo Saameynta badnaa Dalka, Culeyskii ugu weynaa ee Siyaasadeed na saaray Dawlada iyo Shacabka, ilaa laga shakiyey Sabti iyo Qarax in ay fara Yuhuudeed ku jiraa! Sidoo kale Shirkii Kismaayo ee lagu dhisay G5 Oktoobar 11, Qaraabkii Abu dhabi ee keenay Khilaafka 1 – 7 Oktoobar, Casilaadii Wasiirkii iyo Taliyihii Gaashaandhiga 12 Oktoobar, Casilaadii Taliyaashii NISA iyo Booliska 29 Oktoobar, Shirka Madaxda Dawlada Fedaraalka iyo Hogaamiyaasha Gobalada 28 Oktoobar ilaa goormee? Maxaase ka soo bixi kara? “Oktoobarey adaa lahaa”.
Xukuumada Fedaraalka markii la dhisay kadib Barnaamijkii iyo Qorshihii ugu horeeyey April wuxuu ahaa Xasilinta Caasimada iyo Bedelaadii Taliyaasha Ciidamada, siyaabo kala duwan ayaa loo fasiray Guulihii iyo Fashilkii Qorshihii Xasilinta! Lkn waxaa muuqata in Xukuumadu ku qanacday 6 bill kadib in miraha Qorshahaas aysan guuleysan kadib markii ay wada Casishay 3 Taliye iyo Wasiirkoodii Gaashaandhiga!.
Hadaba talaabadan Xukuumada waxaa laga Akhri karaa qodobadan:.
1. In laga Jawaabay qaar ka mid ah; Su’aalihii iyo Niyad-jabkii Shacabka ee dhanka Amniga iyo Mas”uuliyada wixii dhacay!.
2. Inay bilaabatay isla Xisaabtankii ay balan-qaaday Xukuumadu, ayna sii socon-doonto!.
3. In uu bilaaban-doono Qorshe cusub ee Amniga Dalka iyo Xasilinta Caasimada iyo Taliyaan iyo Wasiiro Cusub oo lagula Xisaabtami-doono Mas’uuliyada waxa dhici-doona, kana faa’iidaysta fashalka kuwii ka horeeyey!.
4. Fariin loo diray Madaxda Maamul-gobaleedyada iyo Mucaaradka Xukuumada ee Golayaasha Fedaraalka sida ay uga go’antahay Xukuumadu in ay qaado talaab kasta oo Ammaan lagu heli karo iyo in ay bedesho cid kasta oo aan la jaan-qaadi karin Nabad & Nolol!.
5. In shirka u bilawday Fedaraalka iyo Gobalada aan laga sugeynin wax ka yar in ay siiyaan Shacabka ay matalaan Dammaanad ah in uusan Qarax iyo Qax danbe soo laaban doonin ama ay is wada Casili-doonaan si Damiirkooda iyo kan Shacabka ay u raaligeliyaan!.
6. Odayaasha iyo Xildhibaanada sheegtay magaca Hawiye ee Shalay shiray in laga sugayey in ay taageeraan Qorshaha iyo talaabooyinka cusub ee Amniga ee ay bilawday Xukuumadu! Lkn lagama filayn in Oktoobar 2017 ay dib ugu celiyaan Waqtigii 1991, ” Hawiyow ka kaceey” “Cali gar-leh – Caydiidna gar-leh” 4 Xildhibaan + Siyaasi + 4 Oday + 4 Taliye hore + Qaraabkii Abuu dhabi = Hawiyow waa warey!. Xildhibaanada iyo Odayaasha shalay Shiray oo Qoraalkooda ku xusay in ay Gobalka Benadir u hiilinayaan Xaqiisana raadinayaan, hadana taageeray G5 oo diidan Gobalka Benadir kuna wada sugan Gobalka! Maxey ugala hadli waayeen Xuquuqda Gobalka M. Gaas iyo M. Sharif Xasan mise “aabe ninka yar iga celi waaye”.
7. Hadii lala xisaabtamay Hogaanadii Amniga Soomaalida! Yaa la xisaabtamaya Dawladaha korkeyna iyo Dalkeyna isku haysta oo dhibaatada qeyb ka ah? Yaa la xisaabtamaya Ciidamada korkeyna iyo Dalkeyna dhaqaalaha ku qaata 10 sano kadibna eynan haynin natiijo Cad? Yaa la xisaabtamaha kuwa dhaqaalaha, tababarada iyo Talisyada kala duwan ku kala dhantaalay awoodii iyo Guushii Ciidamadeyna ay gaari lahaayeen?. Yaa la xisaabtamaya Siyaasiyiinteynii hore iyo kuwa noo jooga ee Barri iyo Galbeed u kala qaraab tegaya? Yaa la xisaabtamaya Ganacsatada iyo Shirkadaha Amniga ee Canshuurta siiya Dawlada iyo Cadawga? Yaa la xisaabtamaya kuwa guranaya kheyraadkeyna Habeen iyo Maalinba
W/Q: Dr. Mohamed Nur Gacal
Wasiiru dowlihii hore ee arimaha dibada Somalia
