Ciidamada Milatariga Ethiopia ayaa is diyaarinaya dagaalkii ugu danbeeyay oo ay ku doonayaan inay qabsadaan caasimadda Gobolka Tigray ee Makelle, waxaana diyaradaha Helikobtarka ay waraaqo digniin ah ku daadiyeen daafaha magaaladaasi.
Ciidamada Itoobiya ee ku sii jeeda magaalada Makelle ayaa ku hubyesan Taangiyo, waxayna uga digayaan dadka shacabka ah in ay sidoo kale madaafiic u adeegsan doonaan magaalada, sida ay sheegtay warbaahinta dowladda.
“Qeybaha xiga ayaa ah kuwa ugu muhiimsan ee hawlgalka, oo ah in la hareereeyo Mekelle iyada oo la adeegsanayo taangiyada, si loo dhammeeyo dagaalka aagga buuraleyda ah looguna sii gudbo aagagga difaaca,” ayuu Colonel Dejene Tsegaye oo ah Afhayeenka militariga u sheegay warbaahinta dowladdu leedahay ee EBC.
Wararka Dagaalka ayaa ah kuwo aad ah u xadidan, iyadoo sheegashooyinka dhinacyada oo dhan ay adag tahay in la xaqiijiyo sababtoo ah xiriirkii taleefannada iyo internet-ka ee gobolka ayaa go’an tan iyo markii ay colaaddu bilaabatay.
Labada dhinacba waxa ay sheegeen in ciidamada federaalku ay qabsadeen Adigrat, oo 116 km dhanka waqooyiga ka xigta Mekelle. Dejene ayaa sheegay in dadka shacabka ah ee magaalada Mekelle oo ay ku nool yihiin nus malyan qof ay tahay in ay ka feejignaadaan halista.
“Illaa iyo iminka, waxa aan kaliya weerareynay bartilmaameedyada jabhadda saldhigyada u ah, laakiin marka laga hadlayo Mekelle way ka duwanaan kartaa taas,” ayuu yiri.
Wararka ayaa sheegaya in ciidamada Itoobiya aysan ku leexan inay nadiifiyaan magaalooyinka ay qabsadeen oo ay weli haraarahooda joogan maleeshiyada iyo ciidamada gaarka ah ee Tigreega, waxaana laga yaabaa inay dagaallo kale qaadaan.
