Ciidamada dowladda iyo kuwa Mareykanka ee AFRICOM ayaa howlgal wadajir ah oo isugu jira duqeyn iyo weerar toos ah ka fuliyey xalay degaanno hoos taga degamada Balcad ee Gobolka Sh/Dhexe.
Howlgalkan oo duqeyn cirka ah ku bilowday ayaa waxaa lagu beegsaday degaanada Basra iyo Deniga oo raacsan degmada Balcad, waxaana la sheegay in lagu dilay ilaa 25 ka mida maleeshiyada Alshabaab, halka lagu dhaawacay 15 kale, laguna qabto xubno ay Ajaaniib ka mid yihiin.
Taliyaha ciidamada Xoogga dalka Jen. Odowaa Yuusuf Raage ayaa sheegay in howlgal saacado qaatay lagu dilay sarkaalkii Alshabaab u qaabilsanaa deegaanada u dhexeeya Balcad iyo Afgooye, sidoo kale waxaa la burburiyay saldhigyo ay ku sugnaayeen Al-shabaab.
Degaanka Basra ayaa ah xarun weyn oo Alshabaab ka maamulaan Gobolka Sh/Dhexe ayna ku leeyihiin maxkamad iyo xarumo lagu qaado canshuurta, iyadoo dhowr jeer oo hore howlgallo noocan oo kale ah laga fuliyey.
Warbaahinta dowladda ayaa sheegtay in howlgalka lagu burburiyey fariisimihii kooxda ee deegaanka waxaana ciidanku ooda ka qaaday maxaabiis badan oo u xirnaa sidoo kale waxaa gacanta lagu dhigay tiro maleyshiyaad ah iyo horjoogayaashoodii.
Ma jiro warar madax bannaan oo laga helay howlgalkan oo ah kii ugu danbeeyay ee weerarro dhinaca cirka iyo dhulka ah oo ay wadajir u qaadaan ciidamada Danab iyo kuwa Mareykanka ee Africom.
