Militariga dalka Mali ee ku yaalla Galbeedka Afrika ayaa xiray Madaxweynihii, Ra’iisul Wasaarihii iyo Wasiirka Gaashaandhigga ee dowladda kumeel gaarka ah ee dalkaasi.
Tallaabadan ayaa timid kadib markii isku shaandheyn lagu sameeyay Golaha Wasiirada dalka Mali, iyadoo xilalkii laga qaaday laba sarkaal oo ka tirsanaa xukuumada. taasoo keentay in milateriga ay ka caroodaan.
Madaxweynaha Mali Bah Ndaw, Ra’iisul Wasaarihii dalkaasi Moctar Ouane iyo Wasiirka Gaashaandhiga Souleymane Doucoure ayaa dhammaantood waxaa kaxeystay ciidamada Milateriga oo ku xiray xero millatari oo ku taalla duleedka magaalada caasimadda ah Bamako.
Xiritaanka madaxdan ayaa imaneysa bilooyin kaddib marki ay isla millitarigan uu xakunka ka tuuray madaxweynihi hore Mali Ibrahim Boubacar Keita.
Qaramada Midoobay ayaa ku baaqday in si deg deg ah xorriyadooda loogu soo celiyo madaxda dowladda kumeel gaarka ah ee Mali.
Waxaa kaloo xaaladda dalka Mali ka hadlay, si weyna u cambaareeyay xariga milateriga kula kaceen madaxdii dalkaasi Mareykanka iyo Midowga Yurub oo dalbaday in si degdega loo sii daayo madaxda la xiray si ay howshooda u gutaan.
Dalka Mali ayaa qalalaase siyaasadeed ku jira, iyadoo milateriga dalkaasi ay inqilaab ku rideen madaxweynihii hore, welina ay awood badan ku leeyihiin talada dalkaasi oo dagaallo ay ka wadaan kooxo islaamiyiin ah ayna ku sugan yihiin ciidamo Faransiis ah.
