Warar is khilaafsan ayaa kasoo baxaya qaabka loo qabtay madaxweynihii hore iyo is-maamulka Soomaalida Itoobiya Cabdi Maxamuud Cumar (Iley) oo maanta ay ciidamada federaalka Itoobiya ka kaxeysteen magaalada Jigjiga.
Ciidammada militariga federaalka Itoobiya ayaa la sheegay inay hareereeyeen xaruntii uu ku jiray Cabdi Ileyn iyagoo xoog ku kaxeystay, isla markaana jirdil kula kacay, kadibna diyaarada helikobtar ah uga qaaday magaalada Jigjiga.
Suldaan Cabdulkaahi Bashiir oo ka mid ah salaadiinta Soomaalida Itoobiya oo haatan ku suggan Jigjiga ayaa sheegay in madaxweynaha xilka ka degay si xun loola dhaqmay, isla markaana loo awood sheegtay.
Mas’uuliyiin kale ayaa beeniyay in jirdil lagu sameeyay Cabdi Iley, waxayna arrintaas ku sheegeen mid lagu kicinayo dadka oo lagu doonayo in xiisad lagu abuuro.
Cabdi Iley ayaa galabta maqribkii ka degay Garoonka Diyaaradaha Bole International ee magaalada Addis ababa, isagoo la socday diyaarad Helikobtar ah oo milateriga ay leeyihiin, waxaana la sheegay inuu wadahadallo la leeyahay saraakiisha iyo mas’uuliyiinta dowladda Itoobiya, waxaana arrintiisa gacanta ku haya ciidamada Milateriga federaalka Itoobiya.
